美聯物業營業董事李志成話，維景灣畔一個逾千呎單位，剛以月租萬八租出，計落呎租十七蚊，都算幾高，因為之前都係造十五蚊。其實出得萬八蚊，已經可以有唔少選擇。
租客係政府醫生，住何文田，最近賣咗手上單位，又想試吓新環境，所以租住維景，若果覺得滿意，可能會喺呢度置業。
李志成話，將軍澳三房以上大單位，租務市道一向幾好，可能供應唔多，呎租可達十五蚊以上，而兩房單位只須十二至十四蚊呎。
之前維景都試過有月租萬九嘅成交，但現時放租單位，月租都唔過萬八。
商場大業主辦活動，有時都要搵個主題嚟吸引消費者，新地旺角新世紀廣場、沙田新城市中央廣場及荃灣廣場，就以粉飾家居理想購物站作招徠，購物滿指定金額，有抽獎機會。皆因呢三個場，原來係售賣家具同電器集中地，新地搞吓宣傳，買家要添置家具都知定。
不過，新地話，指定屋苑住戶，可以獲得雙倍抽獎機會，而新地會會員，就可有三倍㖭。
睇嚟加入發展商成立嘅乜會物會，都有着數，唔知係咪商場大業主將來另一個競爭焦點。
租管條例剛撤銷，觸覺敏銳嘅代理，睇準長線投資客需要，嗱嗱臨推出租管服務。美聯測量師行董事張一輝（圖三）話，預計會有更多買開豪宅嘅買家，分散投資，轉投回報較高嘅中小型住宅，對租管服務需求增加，所以成立十人隊伍，提供專門租管服務。
佢話，以前都有替個別投資者做租管，不過就冇正式收費。現在正式成立租管服務專組，如果成功出租，就會收番每月租金三至五巴仙，服務包括代客收租、代交差餉管理費、追收欠租等等。
地產代理行近年多參與慈善活動，料有助改善行業形象。世紀21將軍澳區董事鄺志輝，本身係博愛醫院總理，所以好積極為醫院籌款，搵到世紀21行政總裁吳啟民買三千張抽獎券，總值三萬；鄺志輝自己梗有買番啲，認購咗一千張，旗下分行三十個同事，每人都要買二百張。
地產代理收入唔穩定，全靠促成交易收取佣金，若果肯自發做善事，應該值得鼓勵。
作為本港唯一生產過青花瓷器嘅大埔碗窰，雖然早於上世紀八十年代，已經列為法定古迹，但政府一直未有善加利用，搞咗二十年，直到最近，先搵顧問公司完成保育及發展可行性研究，確立窰址嘅歷史、藝術及科學價值，作為文物教育資源嘅潛力，對本地遊客有吸引力。
報告建議，起文物徑連接遺迹，等遊客一路行、一路了解瓷器製作過程，又將附近荒置村校，改為展覽中心。
聽講，旅發局、康文署同旅遊事務署，都好支持發展碗窰，但報告就冇講幾時可以做好，同邊個畀錢去做，唔知使唔使再搞多二十年呢？
旅遊發展局主辦「2004香港購物節」，點解要去北京搞宣傳？原來購物節重點活動之一係「2004香港購物通」比賽，在全球十五個國家及地區選出得勝者，本月二十日在港參加總決賽。
中國係參賽國之一，經過喺十二個城市舉行預賽後，旅發局日前喺北京東方廣場商場「東方新天地」，舉行決賽，三名嚟自廣州、南京及瀋陽參賽者，採用「現場主題購物」方式比賽，用指定金額在商場內購物，最精打細算嘅兩個，可以來港爭總冠軍。
當日又有時裝及舞蹈表演，同埋大型展覽。
蘭西
電郵地址：
