自從發生「放飛劍」事件後，羅馬王子托迪好似人間蒸發咁，原來呢位失意球星最近享受陽光與海灘之餘，不忘幫羅馬出力，同新任教練柏蘭迪利一齊買球會股票，希望幫球會解決財困。佢兩個固然唔話得，而據聞其餘球員紛紛響應，起晒帶頭作用。
先講柏蘭迪利，佢被委任為羅馬教練後，幾乎櫈都未坐暖、人工都未知收過未就肯出錢，認真抵得諗。至於托迪雖然身處美國度假，但幾乎日日都打電話返球會問境況，又游說其他隊友一齊做球會股東。雖然冇人知佢出咗幾多錢，但佢帶頭就肯定一呼百應。佢今次出錢出力，既幫到球會，而傳媒又唔會再吓吓寫佢吐口水嘅事，至少報道番佢啲正面嘢。
上季由拖連奴外借嘅盧卡利尼成功幫利禾奴升班，拖連奴今季想收回己用。不過呢個肥仔前鋒就話若唔留效利禾奴，就即刻退休。又係嘅，當日拖連奴當佢係「人球」，咁辛苦至有機會跟利禾奴一齊上甲組，又點肯留喺意乙踢拖連奴？不過二十八歲仔就威脅退休又激得滯。
愛華頓前鋒朗尼喺歐國盃後，成為各大球會羅致對象。由於愛華頓錢唔夠人多，於是領隊莫耶斯諗咗條計留住佢，就係委任佢做隊長，莫耶斯話呢個對朗尼係莫大光榮，佢會無法抗拒。我求大俠唔係潑莫耶斯冷水，隊長呢啲係虛銜，又點夠真金白銀嘅轉會費同埋超高周薪吸引呢？
德甲禾夫斯堡喺今夏羅致咗賀夫蘭、基洛加同埋比達錫等有名氣球員，以為可以喺歐洲賽威威。點知人算不如天算，計漏咗今夏有美洲盃，基洛加同埋禾夫斯堡隊友迪阿歷山度要替阿根廷比賽，踢唔到圖圖盃，結果禾夫斯堡喺圖圖盃次圈以總比數三比七不敵瑞士杜安出局，真羞家。
溫布頓新后主舒拉寶娃近日俾英國小報偷影到佢喺佛羅里達沙灘，着三點式嬉水嘅豔照，好明顯小妮子𠵱家已經成為狗仔隊偷拍嘅頭號目標，呢樣嘢睇怕佢都要向同胞古妮高娃請教吓，因為後者都領教唔少。但我求大俠認為食得鹹魚抵得渴，呢啲都係名利帶嚟嘅代價嘞。