重有唔夠兩個月就係世紀之戰嘅立法會選舉，民主派同左派仍在盤算如何攞到最多嘅議席。
民主黨中委會喺呢個禮拜四會拍板落實參選名單，但獨係九龍西未搞掂，事關該黨嘅涂謹申人氣高企，若夥拍有一定實力嘅人參選，隨時可攞多一席，但黨內兄弟對此非常審慎，因為民主黨同石哥票源接近，排第二位參選變相搶走劉千石嘅票，涂謹申承認有兄弟有此顧慮，因此重物色緊競選拍檔。
黨內人士則稱石哥跌票與民主黨關係唔大，佢提出「和解論」同投共產黨票嘅言論，至係令部份死硬反共支持者流失嘅主因。
民協基哥約咗涂謹申同劉千石今日碰頭傾九龍西布陣，雖然民協想盡辦法送廖成利上壘，提出唔同配票同競選策略方案，不過形勢比人強，唔係個別黨派可以話事，因此今日唔容易有成果。
傳真︰2623-9278
電郵︰