葉璇、陳文媛（BoBo）、鄧健泓、黎諾懿同袁彩雲等，日前跟無綫攝製隊去希臘雅典拍攝奧運宣傳片。喺拍攝期間葉璇、袁彩雲同BoBo將擺放咗貴重物件嘅手袋，交託畀工作人員保管，點知嗰位工作人員竟然將葉璇嘅手袋隨意放喺地，一轉頭佢個手袋已不翼而飛。之後葉璇要去當地警署報案，再到美國大使館補領護照。
問葉璇損失幾多？佢話：「護照、錢、手提電話、機票、數碼相機同信用卡都唔見晒，最少損失三萬港紙，惟有當破財擋災，好彩喺美國嘅契姐即刻請假飛嚟睇我，家人又滙咗一筆錢過嚟畀我傍身。」
葉璇又話要多謝鄧健泓同黎諾懿，佢話：「鄧健泓即刻借咗一百蚊歐元畀我用住先，黎諾懿除咗陪我去警局，又猛問我要唔要影相，佢話可以借用佢部數碼相機喎。」
當葉璇收到家人嘅滙款後，第一時間喺當地購物，重話買個新嘅LouisVuitton手袋同銀包用住先。
徐子淇噚日喺柴灣為擔任代言人嘅內地品牌永藝服裝拍攝廣告，早前子淇先跟霍啟山傳緋聞，後來又指被城中名人李兆基兒子李家誠追求，噚日子淇依舊否認同霍啟山嘅緋聞，但就話享受被人追嘅感受。至於李家誠有否追佢，子淇話：「你哋話呢？」言語間似乎暗示咗二人嘅關係。
岑建勳早排終於攞到回鄉證，佢重即刻大鑼大鼓同老婆謝寧去上海旅行，全程重有隊攝影隊跟住佢哋兩公婆，拍低佢哋行街食飯嘅過程。謝寧噚日喺港台做節目，問佢老公咁耐冇返大陸嘅心情係點？謝寧話：「佢好開心囉，一來佢好耐冇返去，二來佢都冇去過上海，所以心情好興奮。」謝寧又話因為佢要返香港做節目，所以佢只係去咗三日兩夜，佢老公就重會去北京，大概逗留十幾日。
洪金寶（三毛）噚日去港台做訪問，三毛話喺香港拍完手頭上嘅戲之後就會即刻返美國陪老婆，講起佢個仔洪天明最近同楊怡傳緋聞，三毛話：「我都唔知邊個係楊怡，後生仔拍吓拖有乜所謂，如果佢一腳踏幾船咪叻囉，最緊要唔好掂毒品。」
《哈利波特神秘的魔法石》上星期六喺無綫作電視首播，平均收視有三十二點，即有二百一十萬觀眾，而最高收視嗰陣更有成二百三十萬觀眾捧場，成績認真唔錯。馮仁昭聽聞嚟緊和路迪士尼會同無綫合作，安排《反斗奇兵》同《獅子王》等動畫電影畀無綫首播，以配合○六年香港迪士尼開幕。
無綫近期重整架構同進行大換血，好多老臣子都要退休，馮仁昭聽聞除咗陳灌明同汪岐外，有「化妝大師」之稱嘅無綫藝員形象科經理陳文輝，亦將會喺今年十二月退休。
雖然陳文輝今年已經六十八歲，但佢怕退休之後無所事事，所以到時會計劃返內地做生意。
