全國政協副主席兼愛國元老霍英東個乖孫霍啟中，被警察發現凌晨喺沙宣道游游下，上前截查，當場搜出懷疑係大麻東西。呢位警察叔叔可謂有眼不識泰山，竟將霍少爺生擒返署，要佢簽保一千元！
霍英東啲孫近來趣聞多多，已有霍啟山與大陸豔星章子怡午夜火熱豔照曝光，𠵱家又整鑊霍啟中涉嫌藏毒案，真係位位都咁有性格，可惜碰正個唔生性嘅警伯。
不過唔怕。霍啟中被擒，經驗明正身，都未必有難。事關律政司嗰邊，有愛國嘅梁愛詩把關。詩姑連胡仙都放生，呢個一來係霍英東個孫，二來就算查明真係藏大麻都濕濕碎，況且後生仔初犯，冇理由唔放人家一條生路，以示鼓勵人改過自新，真係董家飯平呀？
所以霍老唔使怕，不過一哥就有多少頭痕，事關維園阿伯會怒斥警方迫害愛國人士嘅英雄後代，大力拍打警車，甚至質問老董，咁樣係乜意思？係咪警隊有大量前港英卧底？李柱銘去美國國會出席聽證，又唔見警方以「漢奸罪」拘捕佢，矛頭淨識針對住愛國人士，應該成個警隊反轉大清洗。
霍啟中點解被指涉嫌藏大麻？可能係佢留學英國，俾英國佬教壞。話時話，霍公一世人遭港英迫害，當年星光行入伙，俾港督落柯打斷佢電、拖延佢裝電話，霍公一向唔隱瞞佢對英國佬恨之入骨嘅情緒。但唔知點解，嘿，佢竟然唔支持特區嘅母語教學，反而將啲孫孫一個二個送晒去英國受教育喎。英國佬查到佢哋背景，就梗係教佢哋玩明星兼食大麻，企圖陷害喇。
以後咪咁蠢嘞霍公。嗱，想霍家啲孫品格純正、戒甩啲壞習慣，應該吸收教訓，將啲孫送上北京清華，帶頭示範吓愛國教育嘅好處呢。教統局局長李國章，自己係劍橋畢業，都識得改邪歸正，佢自己啲仔女雖然冇人返中國讀書，但佢就識帶住一團所謂嘅香港「領袖生」上北京受訓。霍英東大可以阿爺身份，叫佢啲孫馬上向英方辦理退學手續，改為北上祖國，轉校清華，都未遲㗎。喺大陸，藏有大麻分分鐘會打靶，雖然以霍家後人地位，出咗事都有人一個電話搞得掂，但相信點都會對年輕人有少少阻嚇嘅係咪？
至於警方，李明逵今次都要對截查霍少爺嘅警員進行一次深刻愛國教育：今次你拉得霍英東個孫，下次又拉邊個？警方究竟有冇全心全意回歸咗祖國？特區警員係咪個個都自認係中國人？若然係，點解會掉轉槍頭，針對番自己祖國？係咪肥彭或陳方安生遙控教路？
呢件案唔徹查，李明逵擔當唔起。八方代表左派嚴正呼籲警方：停止迫害愛國人士！
傳真︰2623-9278
電郵︰