日本水着女星岩佐真悠子，最近喺日本嘅人氣愈嚟愈掂，佢除咗下個月會同埋一班水着姊妹組成「missmagazine2003」殺入樂壇外，日前又幫新一期日本雜誌《FRIDAY》拍咗輯寫真。
今次岩佐玩玩新意思，同大家去日本嘅「錢湯」，即係我哋平日叫嘅浴場，教吓大家點樣洗白白喎。岩佐話：「平日我最鍾意喺屋企慢慢咁洗白白，不過耐唔耐去吓錢湯沖涼，都好好玩呀。」
日本人去錢湯沖涼都好講究㗎，第一件事梗係要除衫先啦，不過大家咪心邪住，醒目嘅岩佐已經着咗套鮮紅色比堅尼打底，之後重量埋血壓先沖涼，認真小心兼錫身。
岩佐話沖涼想沖得乾淨，最緊要係多番梘泡，因此沐浴露一定唔可以慳，然後要由腳板底開始捽起，佢重話夏天一到，女仔就最鍾意着露背裝，所以背脊就梗要擦乾淨啲啦，重有肚臍位都唔可以求其㗎，如果肚臍黑麻麻，着低腰褲時俾人見到就醜死鬼咯。岩佐最後用水沖走啲泡泡，然後走入大浴池浸餐飽，認真疏乎。