中共元老鄧小平去咗見馬克思咁多年，佢嘅一字一句對中央官員、特別係特首董建華，仍好似聖經一樣神聖，三聯書局新出版嘅《鄧小平論「一國兩制」》（圖），就係將鄧伯伯生前凡係講到香港同「一國兩制」嘅言論輯錄成書，阿董同中央官員高祀仁、楊文昌等噚日當然要畀面出席新書發布會，重不厭其煩咁將鄧公嘅言論重複又重複，都係想叫香港人學乖啲，唔好再搞抗爭。
本書共有十七篇文章，由鄧公八二年到九○年嘅文章談話及訪問都有，上台發言嘅除咗特首同高祀仁等，重有港大法律學院教授陳弘毅，佢長篇累贅咁引鄧公言論，八方聽到其中一句好有感觸，呢句大意係要團結各界人士，包括罵共產黨嘅人都要團結。
咁北京政府一直唔畀香港民主派人士好似李柱銘同司徒華等返大陸，咪即係公然違反鄧公嘅最高指示？
傳真︰2623-9278
電郵︰