繼廣興國際（1131）事件，噚日又爆出先科國際（724）高層被廉政公署調查，懷疑有人俾錢人買股票事件，令一眾炒家人心惶惶，睇嚟二三線炒股有排都唔使旨意玩。
小初參考上次廣興停牌到𠵱家都未復得牌，睇嚟先科今次亦唔會例外，如果手上有貨，要預咗有排坐。
既然呢排唔使諗玩二三線股，小初轉過去炒大價股，其中一隻可以留意係利福國際（1212），皆因隻股不知不覺已經升越經紀黃之前10元嘅目標價，但佢重話高處未算高。
利福旗下崇光百貨，單睇銅鑼灣人流就知佢好生意，據講佢地喺上海嘅久光百貨生意亦相當掂。雖然隻股走勢相當飄忽，但似乎都係處於上升軌之中，後市仍可看高一線。
利福噚日跌2.44%，收10元，成交股數113萬股，金額1132萬元。經紀黃話，可以吼住股價回多少就上車，應該可以搵到三茶兩飯。
慕容小初