今屆立法會好快就曲終人散，主席范徐麗泰肯定會出直選，喺港島區穩取一席。不過，由於范太星期四重要以主席身份見記者，總結一下過去呢四年嘅工作，所以知情人話，佢最快星期五宣布參選。八方問佢嘅競選經理周德熙，范太係咪俾老董個遲來嘅答問大會阻住收工，佢話都唔係，反正都預七月中誓師，睇怕一定喺本周之內宣布參選。
八方要讚吓范太呢屆嘅表現，算係非常得體，得到立法會各派尊重，並非易事，而由於有佢老人家幫手，終於將個十幾二十年未裝修過嘅立法會記者室改到靚一靚，但係仍然有美中不足地方，就係記者室愈來愈唔夠位坐。
點解八方會咁講？因為呢幾日唔知係咪太多記者喺記者室，搞到唔夠位，竟然俾八方同事見有行家要兩個人，一男一女坐埋一張櫈，重搞到坐喺人哋大髀度，聽講一眾記者都嘩然起哄！怕且行政管理委員會都要諗吓加番多兩張櫈，免得出現尷尬場面。
傳真︰2623-9278
電郵︰