大型商場經營得法，每年可以為大業主帶來可觀收益，真係好似揸住隻會生金蛋嘅鵝。恒基將軍澳新都城一至三期商場，共百五萬呎，以二期最大，佔百萬呎，有二百幾個舖位，聽租務市場拓展部副總經理薛伯榮講，出租率接近全滿，每年租金收入近三億。
為提升形象，恒基將商場重新定位，引入唔少著名品牌，好似實惠家居廣場及稻香集團港灣海鮮飯店，各租用逾萬呎。至於電器店Best則承租八千多呎。
新都城二期商場，長遠目標係想做區域性商場，吸引外區消費者。商場又推出多項增值服務，好似嬰兒車及輪椅借用、本地傳真及影印、手電充電、輔幣找換及售賣郵票等。本周末，重同國家地理頻道及海洋公園合辦教育推廣活動。
近年恒基為新都城商場做宣傳，一浪接一浪，足見佢哋好重視呢個場。
雖然話樓市氣氛無之前咁好，不過，資深投資者一樣冇有怕。好似專炒新界樓嘅投資者「鬍鬚余」，繼早前賣出屯門市廣場單位獲利之後，剛賣出荃灣海濱花園兩個單位，又賺八十幾萬。
世紀21葛偉麟話，一個係三座中層H，七百呎，成交價逾百九萬，今年三月以百五萬買入，四個月賺近四十二萬。另一個係去年十一月，以近百二萬買入嘅十七座低層A，七百七呎，現以逾百六萬售出，執近四十三萬。
寫字樓價格急升一輪，開始要唞一唞，買家自然想趁機執平貨，但業主覺得後市唔係太悲觀，不甘出貨俾人壓價，既然有實力守，不如睇多陣，等市況明朗至算，因此，近期成交銳減。
不過，業內人士奇怪，過去買賣淡靜時，租務會多番，今次竟然係租售兩閒，認真不妙。深入了解，原來業主見售價急升，諗住租金升幅就算跟唔足，點都唔會差太遠，叫租都加番咁上下，但租客就係畀唔到，咁咪變成租市都冇得郁。
業內人士話，其實寫字樓租務市道未如想像中好景，唔少租務成交都係區內租客左搬右搬，部份再擴充啲樓面，新公司數目根本唔多，咁又點可以支持租金上升呢？
物業管理呢行不斷要聘請新人，信和物業管理總經理杜日生（圖四）話，與香港青年協會合作，特別成立「信和會所育苗計劃」，招聘二十名青少年，擔任「體育及康樂助理」，培訓為期六個月。
除參與會所實際工作外，學員還學習客戶服務技巧、儀容、電話禮儀、活動籌劃、各種會所設施操作及保養等，期滿而表現優秀會獲正式聘用。
杜日生話，計劃可以為青少年提供就業機會，及為行業培訓管理人才，實是一舉兩得。
港人習慣慳得就慳，所以送贈現金招徠，零舍吸引。
中原宣布推出客戶綜合服務後，準備送出總值三十萬禮品，畀申請服務嘅客戶，其中包括二千張五十蚊惠康超市現金券。
聽中原客戶綜合服務董事總經理鄧意民講，服務內容包括室內設計、裝修、搬遷、律師服務等，採用有關服務的客戶已超過一百個，其中一個使用服務總值達百二萬，認真捧場。
蘭西記得，早前世紀21沙田第一城分行開張時，都有送百佳現金券畀放盤業主，可見呢招真係有用。
蘭西
電郵地址：
