選舉日近，想參選連任嘅議員都加倍努力，噚日金融服務界嘅胡經昌就公布過去四年嘅工作報告，胡議員就話明唔係為咗選舉而出報告，只不過點都應該交代一下。兩位四年前一手捧佢出嚟嘅證券界前輩張天生及許照中，噚日都有嚟支持佢，不過胡議員就點都唔肯宣布會參選連任，睇嚟要等月尾報名時至講。睇番佢份報告，佢喺立法會嘅質詢問題，由第一年全年只有七題，升到第四年嘅二十一題，愈近選舉，數目愈多，諗落同股市愈近配股，股價愈被炒高都幾似。
講開財經事務，曾任特首新聞秘書嘅財經事務及庫務局副秘書長區璟智本月底會離開財庫局，下月轉到房屋及規劃地政局，負責西九龍文娛區嘅特別職務，職銜依然係副秘書長，同各大地產商周旋。區小姐當初做財庫局時，都係做特別職務，負責證券及期貨條例綜合法案嘅複雜工作，睇嚟佢都有啲特別職務命水。
傳真︰2623-9278
電郵︰