《哈利波特》已成為電影公司的暑期提款機,你話小朋友們暑假冇睇過《哈利波特》,返學校點同同學仔交代?你話大人們暑假唔帶小朋友睇《哈利波特》,點同小朋友交代?
大人們每天營營役役為口奔馳,大部份都將屋企個細路交託畀菲籍家務助理、學校、電視、上網同埋遊戲機,難得有齣戲細路擘大喉嚨話要睇,大人又有特技睇,個原著故事喺學校又有得睇,擔保冇乜不良意識,於是《哈利波特》就成為一年一度向小朋友贖罪嘅好機會,一家人睇齣戲、食個包,陪吓細路之餘,自己亦有點娛樂。
《哈利波特.阿茲卡班的逃犯》找來一位新導演艾方素卡朗炮製,卡朗是一位奇怪導演,以往作品不多,但題材卻頗兩極化,有成人口味,亦有兒童電影。這一集《哈》片找來兩大實力派演員加利奧文及愛瑪湯遜當茄喱啡,不是說笑,是真的當茄喱啡般用。加利奧文雖然飾演所謂的主角阿茲卡班的逃犯,但其實佔戲不多兼沒甚發揮;愛瑪湯遜則更嘥料,只是過場演出一名占卜女教師。以往兩集中,各演員演來都有神采,但到了第三集,大家顯得有點沒精打采,特技方面也欠缺話題性的新設計,狼人、鷹馬與黑狼狗都不是新鮮,好多B級片都有得睇。
哈利仔因為趕拍第四集而冇去巡迴宣傳,電影公司正為哈利仔的快高長大頭痛,唔知會唔會最後出動高科技定型水將哈利仔身形定住,好似當年歌曼妮茲咁,係就冇陰功!