曾承諾支付上月墮樓命危頑皮貓「乒乓」醫藥費用嘅立法會議員「飛天豬」朱幼麟，果然牙齒當金使，前日委託秘書小姐將一張面額一萬八千大元嘅支票，送到乒乓留醫嘅動物醫院再轉送貓主黃太。對於素未謀面嘅飛天豬善舉，黃太感到萬分謝意，但係「埋單計數」，乒乓醫藥費都要三萬元，黃太正為餘下一萬多元費用𢱑頭。
「一諾萬金」嘅飛天豬昨日接受訪問時表示，希望乒乓早日康復重投主人懷抱，「一家團聚」。一向嗜好多多、愛心爆棚嘅飛天豬坦言自己信守承諾，能做嘅都做咗，雖然佢未有明言會否再向黃太伸出援手，但強調黃太作為乒乓嘅主人，佢自己亦要想想辦法籌旗﹙錢﹚。
講開又講，上月十八日喺西環皇后大道西五樓主人家中墮樓重傷嘅頑皮貓「乒乓」，不經不覺留醫救治已經二十四日，多處內臟出血、下顎及胸肺爆裂、四肢折斷嘅「乒乓」經過大大小小多次手術搶救後，小命雖然暫時得保，但現時身體五勞七傷，仍然虛弱。
傳真︰2623-9278
電郵︰