英國球星碧咸（DavidBeckham）近日同老婆Victoria去咗摩洛哥度假，一解失意歐國盃嘅困悶。不過噚日有報道話碧咸嘅阿媽珊迪娜（SandraBeckham）打電話鬧咗Victoria嘅阿媽積琪（JackieAdams）一餐，而碧咸夫婦又喺度假期間為生女嘅事嘈交，悠閒假期變咗一鑊粥。
據《世界新聞報》報道，碧咸嘅阿媽珊迪娜好唔滿意Victoria阿媽積琪早前打電話去電台對碧咸兩公婆嘅婚姻說三道四，又自作主張請個催眠師幫碧咸，珊迪娜覺得親家奶奶經常主動報料出風頭，所以日前打電話去鬧衰佢。一位知情人士話：「珊迪娜日前打電話鬧衰積琪，警告佢咪咁多事，搞到人人以為碧咸兩公婆好似小丑咁。」
兩老爭吵搞到六國大封相後，消息好快傳到碧咸耳邊，令呢位萬人迷煩上加煩。早前有傳碧咸夫婦想生番個女收拾問題，不過碧咸覺得生女解決唔到問題，重發Victoria爛渣。之後Victoria頂唔順，又鬧番碧咸轉頭，引發另一輪罵戰。
碧咸近日事業失意，成日胡思亂想，佢重成日同朋友講皇馬將唔會同佢續約。碧咸話：「我心情好差，好似失敗者，Victoria根本唔明發生乜事。」