呢排二三線股主題係炒業績，好似之前嘅莎莎（178）、理文造紙（2314）及冠華（539）等均在業績公布前炒過一輪，至於業績公布後，有人趁好消息出貨，亦係好自然嘅事。
至於在本周公布業績的多間公司中，經紀黃同小初不約而同睇好老虎仔隻遠東發展（035），估計遠展在周四公布全年業績前，股價仍然有得去。
遠展調整至6月中，股價在1.20元水平見底，之後一條氣咁炒上，其間大市回落，佢只係大漲小回，甚至人跌佢唔跌，上周五收市已經升至1.63元。隻股走勢咁堅挺，顯示投資者對佢嘅業績有好大信心，炒家亦對隻股不離不棄。
另外，經紀陳早前講過一隻奇股，前稱辛康海聯嘅南海石油（076），股價繼續屢創新高，而且成交愈嚟愈大。南海石油上周五升8.08%，收2.675元，又創新高，成交股數有500萬股，金額1306萬元。
小初真係唔明白，如果係搞緊私人派對，使唔使炒得咁勇猛？莫非有堅野搞緊而外間唔知道？
慕容小初