朱茵、戴辛尉噚日喺沙田新城市廣場出席「愛護動物協會」活動，朱茵一向視狗如命，佢亦都係因為狗先同黃貫中（阿Paul）走埋一齊，佢話：「我屋企有五隻狗，阿Paul有三隻，一共有八隻，𠵱家我已經去到唔可以同我啲狗分開嘅地步，最慘好多時我要離開香港。」
講到張曼玉俾人偷影泳衣春光照，過來人嘅朱茵果然不吐不快話：「藝人都係人，去旅行都要顧忌，好辛苦，咁不如去北極旅行，咁咪影唔到囉！」
而戴辛尉被問到裝修公司追收裝修費件事搞成點時，佢話：「冇人打電話追我，我會被動處理，冇法律追討我唔會理，我係有住過間屋，不過係半年前，𠵱家我都唔係住喺嗰度，兩個月前有好價我已經賣咗，當時我乜裝修數都找晒！」
汪明荃剛喺內地做完粵劇巡迴，噚日就喺將軍澳電視廣播城做《2004全港粵曲之王爭霸戰》司儀。講到阿姐受勳，佢話遲啲會擇日擺番幾圍慶祝。至於早前無綫高層陳志雲特登搵佢食飯，佢話：「係啊！係我畀面佢，佢都算係一個開放高層，我喺無綫做咗三十幾年，我梗係關心公司，咁佢咪同我解釋公司嘅問題。」
余文樂向來緋聞多多，噚日佢喺赤柱出席一個商台活動，主題係分享初戀經歷，但佢竟話自己讀到中五先初戀，大家係咪有啲懷疑呢？余文樂重誓神劈願話：「真係㗎，如果假嘅我冇女媾，乜都冇，正契弟，初戀女友重係同我一樣，係田徑隊隊員，但拍拖年幾就分咗手。」
蕭正楠噚日喺銅鑼灣義賣仁濟獎券，有唔少fans同途人都幫佢買。蕭正楠有份演嘅內地電影《無法尖叫》本來今個月底上畫，點知撞正劉德華套新戲《十面埋伏》，即刻改到下月中先上。另外蕭正楠最近分別傾緊拍電影同一套中、日合作嘅電視劇《中華小廚師》，雖然電視劇係執二攤，但佢話一啲都唔介意。
張惠妹噚日下午由台灣中正機場出發去北京，出席申辦奧運成功三周年嘅慶祝活動，並會上台表演。啱啱考到車牌嘅阿妹話好開心內地嘅杯葛事件已經告一段落，佢做完北京啲嘢，就會返台灣準備二十二號嘅演唱會，到時會請好多圈中人一齊為「七二」水災災民出一分力，王力宏都會出席呢次活動。
林心如經好朋友蘇有朋介紹，已決定接演中韓合作嘅新劇《魔術師》，蘇有朋同韓國紅星安七炫都會參演。心如近排就喺北京勤練魔術，重話好開心接到呢套劇，因為佢已愛上魔術，佢話：「下次我回台灣，就靠這個魔術騙人，大家小心被我騙得團團轉！」心如嘅戲服有五十套咁多㖭。
徐若瑄前晚喺台灣着住熱褲出席新人組合元衛覺醒嘅慶功宴，佢話自己係師姐，梗係要去捧場，又話自己忙緊籌備新碟，順便邀請成員之一、賈靜文細佬衛斯理作歌。雖然徐若瑄講到好似好有心咁，但實情佢只係逗留咗十分鐘，就急急腳咁走人。
