打麻雀可算係中國人嘅國粹之一，之前甚至有人提倡列入奧運項目，幾乎有華人嘅地方就有「開枱聲」，其對局間嘅變化及競技性，絕對係刺激與娛樂兼備。PS2宣布推出全中文化嘅《麻雀派對》，打法跟足真正廣東牌例，重派出10大水着女優跟你對戰，可算係炎炎夏日嘅消暑佳品。
記者、攝影：徐影龍
ImageGirl：Suki
(c)YellowCabCo.,Ltd.
(c)OfficeMInc.
(c)BackupPromotionInc.
(c)HORIAGENCYCo.,Ltd.
(c)TENMEIKANOH?TELENETJAPAN20
雖然近年好多港人轉玩台灣牌或大陸牌，不過傳統廣東牌仍屬主流，始終最多人玩。但係不論遊戲機或PCGame，真正打廣東牌例嘅少之又少，就算最多人玩嘅《明星三缺一》，都只係介乎台灣牌及廣東牌之間，十分之古怪。PS2呢款《麻雀派對》就唔同，打正旗號全廣東牌例，不但玩法跟足港人嘅玩法，就連胡牌番數、得分計法都跟到足，如港人琅琅上口嘅「四番32、六番64」等，而且全中文化登場，玩落肯定大呼過癮。
有隻金碟喺手，當然第一時間試吓個廣東牌例做得好唔好。一開波已覺跟日本牌大有分別，各人打過嘅牌再唔係放喺自己前面，而係全部堆晒喺「公海」，呢點亦係廣、日牌例嘅最顯著分別。由於廣東牌允許玩家食番自己打過嘅牌，唔似日本牌咁打過嘅牌就唔食得對手，即係港人可重施陰人伎倆喇。
另一大分別就係設有「花牌」，每隻正花或冇花都有番數加，變相加大胡牌嘅番數，可惜試玩期間未攞過7、8隻花，唔知有否「花胡」存在。番數計法方面，基本採用「三三制」，即混一色、對對胡為三番，清一色就「雞七平八」，可算係最大路嘅計法，不過金碟版本未能更改起胡番數，四圈牌入面大多一番搶胡，鍾意做牌嘅人士，大可到設定更改成三番起胡。
試玩金碟玩到嘅內容唔多，只得「水着美女對局」同「畫廊」兩項，前者係不繼挑戰眾多水着美女，以四圈牌內爭頭位為目標。畫廊就係收錄你用點數換返嚟嘅靚相，有便服有水着，相片總數超過350張！
從Menu中看到，其實重有唔少遊戲模式未開啟，例如以偵查案件及解救靚女嘅故事模式、買靚相同道具嘅商店模式、翻睇成績嘅DATA選項等，最吸引可算係迷你遊戲一項，從官方相片中，已肯定有為人熟悉嘅《神經衰弱》、《四川省》等，若果正式版有埋《上海》就Perfect囉，咁多模式加加埋埋真係有排玩。
靚女陪打麻雀唔係咩新鮮事，要引人玩當然落重本。《麻雀派對》就搵嚟日本著名經理人公司YELLOWCAB幫拖，出動10位有名氣嘅水着女優撐場，包括河合香織、福下惠美、五十嵐結花等靚女，全屬樣靚身材正之輩，攝影重係日本名家加納典明操刀，當隻Game係靚靚寫真集都得。不過咪以為靚女「胸大無腦」好恰，玩落發覺個個都係食胡高手，而且當碰牌、食胡時會以大頭Cut-In登場，若果淨係掛住睇靚女，分分鐘輸清光離場。
遊戲類型：益智
對應機種：PS2
遊玩人數：1人
發售日：8月12日
行貨售價：未定
開發商：CBCTELENETJAPAN
