大遊行（Ⅱ），又整多五十萬，今年阿董精咗，即晚回應，除咗唔答問題，話「今晚夜嘞」之外，最重要嘅訊息，係將○七○八普選個波交畀中方，話政府會照人大常委釋法嘅決定去做。
民主派要求特區政府重新啟動基本法附件一所准許嘅提議權。即是話，人大常委釋法，到咗今年7.1，唔敢話無效，起碼係過咗時。阿董若然與時俱進，以今年7.1嘅民意為最新依據，再次向中方遞交○七○八普選申請表，喺技術上，並無違反任何憲法。
根本上，若然國家真係對特首高度信任，只要特首北上，拍心口講句「○七○八普選冇問題，一切責任包在我身上」，中方又有乜理由唔准許？唔信港人，都應該信自己所欽點嘅特首。港人冇權向中方直接要求○七○八普選，只係得特首一個有權。咁阿董又話會小心聆聽民意，又話要改善施政，今年7.1，要求「改善施政」嘅核心訴求，就係特首企硬，吸納（唔係「反映」）香港民意，將要求普選嘅廣泛民意，融化為特區政府嘅共識立場，然後由深得江總、胡溫、曾副主等國家領導人信任嘅阿董，以特首名義，一個人攬上身，向中央人民政府交涉。
咁先至叫做代表香港嘅特首，強勢行政主導嘅特首，促進香港利益嘅特首。哦，位位四五百萬年薪，世界級人士，中間人就爭住做，DHL就爭住坐飛機去速遞，一講到擔當就嗱嗱聲快閃兼卸膊，呢啲咁呃錢嘅工，三司十一局好意思打？
行政主導係你自己至有本事主動建立嘅，做一個弱勢政府，又係自己揀嘅，○七○八普選，冇錯人大係釋咗法，但𠵱家港人要上訴，特首嘅職責，收咗納稅人份人工，係同上訴人做辯護律師，而唔係做律師樓嘅「馬腎蓆」，只係負責將叠文件交去法院。
特區政府嗱嗱臨搵路走，咁就變咗再次迫中央人民政府及江胡溫曾等，喺國際社會背負不民主之名。做仔嘅，一鋪鋪將阿爸擺上枱做醜人，兼成個政府遇着大事就閃，未來三年點捱落去？
傳真︰2623-9278
電郵︰