周末兩日假期去咗幾個parties，見親嘅人都係講醫管局事件。最新傳聞係高永文唔會再續約，下一步應該輪到何兆煒嘅去留。
八方記得去年沙士來襲之時，全香港都唔警覺，個個掛住睇伊拉克局勢，直至何兆煒中招入院方如夢初醒。如果由呢個角度睇，何兆煒好有功勞。
講番啲老友嘅睇法，唔同背景有好唔同見解。醫療專業界嘅人大多同情楊永強，話佢係好人；佢哋認為全新瘟疫無從防範，秋後算帳太政治唔專業，袁國勇昨日亦有類似論點，重話好傷心。但其他非醫療界人就認為問責係好現象。能退能再上，外國好多例子。
呢個咁大嘅分歧，正正反映出問題所在。專業界與普通人在同一件事認知、睇法、價值判斷上完全唔同，點溝通呢？新任醫管局主席可能搵個唔係醫生嘅人做，會有啲幫助。至於話冇人肯收拾爛攤子，朋友就話唔使擔心，大把人等住呢個位。
傳真︰2623-9278
電郵︰