楊永強、梁智鴻相繼辭職，公立醫院（如瑪麗醫院）有啲反彈，認為立法會調查報告唔公平。其他人就唔同睇法噃，認為佢兩位如果早啲辭職，例如夏佳理嘅醫管局調查報告出咗之後就請辭，重會更好。私家醫生界素來都覺得楊永強想趕絕佢哋，對佢全無好感。醫生C飲茶時候同我哋班老友講起楊永強，幾乎拍爛手掌，與徐詠璇嘅反應如南極vs北極。
兩位仁兄走咗，邊個去接任呢？有四個基本條件：第一、要有威勢，鎮得住；第二、要係董生老友，唔係民主派中人；第三、形象唔乞眾憎，唔會令市民反感；第四、要唔介意做三年替工之後，就冇得做，因為第三任特首未必喜歡佢。另外第五，如果本身係醫生，更佳。
我哋傾咗成餐午飯，諗到兩位大佬，一個係羅嘉瑞醫生，一個係鄭維健醫生，兩人都合晒以上五項條件。如果羅生替楊永強，鄭生替梁智鴻，董生就會好安樂。只是羅醫生曾經做過醫管局主席，據講經驗唔多愉快，𠵱家要佢犧牲做酒店、地產生意嘅時間，犧牲未免太大。董生好難說服佢。
鄭生啲投資生意，大把夥計管，機會成本比羅生細好多，況且佢做中央政策組之時，亦係全職，做局長都係一樣啫，如果由佢做衞生福利及食物局局長，啲官員要做到搏晒命咯，因為佢非常勤力，以前練乙錚受重用之時，晚上十點食完晚飯都要返去辦公室同鄭醫生開會㗎！
有位教授聽講好想做局長或者醫管局主席，亦未必冇機會。一位接近「旅遊局」消息人士話，某教授好鍾意高調，俾記者影相就幾高興，如果董生開口，佢一定應承也。