年初曾經錄得轉手皆有斬獲，金額動輒五六十萬，甚至近百萬嘅鰂魚涌逸樺園，近排市況趨於平淡，轉手賺錢幅度大為收窄。
利嘉閣分行經理李嘉華話，剛易手嘅單位，半年咁耐都僅僅升值3.4%。
二座高層E，逾千一呎，有四個房，為屋苑最大面積標準單位。業主年初用五百九萬，喺二手市場購入，打算供從外國返港嘅家人居住，豈料家人改變初衷，所以決定放售單位。現在以六百一萬賣畀外區換樓客，帳面計落，賺二十萬，但原來「明賺暗蝕」，因為扣除使費及銀行罰息等支出，相信實際要蝕十幾萬。
單位一手價係四百六七萬，估唔到第三手已經要蝕本離場。
李嘉華指出，逸樺園一手購入後願意放售嘅，已經賣得七七八八，現正放盤，多數係唔急於出貨，因此叫價普遍偏高，二十多個放售單位，平均呎價要六千蚊，比市價五千八為高。放租盤有十幾個，呎租叫價二十五至二十八蚊。
蘭西早輪提到，有銀行因換馬而沽售大坑高景大廈三個單位，一周左右便全數賣出，平均八百呎，成交價由百九萬至二百一十五萬（連車位）。
蘭西日前同業內人士傾開，佢話，高景大廈一向買賣唔多，好似低層C室，上個月初以一百七十萬轉手，同銀行賣出嘅低層D室，作價百九萬差唔多。而再對上一宗，就要數到今年一月，中高層B室，易手價係一百九十一萬。
由於呢幢係舊樓，業主叫價好多時比較高，唔夠貼市，所以成交價比叫價低好多，都未必等於執到筍貨。呢個情況，舊樓特別多。
樓市近月轉靜，但上半年計地產代理搵到食，有啲重賺到笑，所以肯入行者大增。
地產代理監管局話，上半年參加電腦化營業員資格考試，超過二千三人，較去年下半年大增四成六。
地監局行政總裁陳佩珊（圖二）話，為滿足需求，由七月十三日起，增設周一及四上午考試時段，以往只有周一至五下午有得考。第日營業員要考牌就更方便。
另外，想做代理行管理工作、董事、合夥人或老闆嘅都唔少，因為年初到現在，報考地產代理資格試有五百人，係兩年新高。
陳佩珊認為，數字反映過去一年樓市有復甦迹象。
美聯物業九龍區主帥羅國安，日前率八位得力助手，前往澳門開離岸業務會議，商討下半年九龍區發展策略部署。
講九龍策略，點解要過澳門？聽羅國安講，今次選擇濠江，皆因集團早前在當地成立首間分行，可以在開會之餘，順道考察埋澳門樓市，一舉兩得。
澳門分行副董事林志光親自帶領各人，參觀多個一、二手物業，以及板樟堂街舖位。
香江住宅樓市近月偏淡，代理又不斷增設分行，佣金收入唔跌都停滯不前，下半年暫時未見有太多利好消息，若果交投唔回升，睇怕都有排煩，唔怪得多咗行內人士放眼離岸業務。
奧運熱潮席捲地產界，除咗商場借勢搞推廣活動，開售在即嘅新盤東涌映灣園三期都唔執輸，發展商長江實業噚日喺屋苑會所室內泳池，搞迷你水上奧運會，一方面宣傳就快開售嘅第三期，另一方面趁勢推介物業會所多達七十幾種設施。
除屋苑住客外，連同區私人屋苑住戶都請埋嚟參加比賽。今次比賽，重意外發掘咗個年紀細細嘅游泳健將，單人囊括三項冠軍，長實高級營業經理郭子威話自愧不如。
蘭西
電郵地址：
