喺新球季由英超聯降落英甲聯比賽嘅列斯都算慘嘞，就算賣晒啲值錢嘅球員都清唔到條數，𠵱家可能連個主場艾蘭路球場都要賣。
負債達一億鎊（約十四億五千萬港元）嘅列斯，近兩年雖將羅賓遜、李奧費迪南、活基治、米拿、基維爾、阿倫史密夫同維杜卡甩手，以高價賣畀其他球會，但總係周身債；𠵱家為咗減債，佢哋或者會賣球場，之後再租返嚟用。
列斯搞成咁，一日最衰都係佢哋前主席列斯杜爾同前領隊奧拉利。列斯杜爾喺在任期間，任由奧拉利亂咁以高價買人，結果搞到一身蟻。
話晒列斯幾年前都威過，重試過喺○○/○一球季嘅歐冠盃打入四強，所以我求大俠見到佢哋淪落成咁，都覺得好欷歔。而列斯呢個事例亦警醒咗其他英超聯球會，千祈咪洗脚唔抹脚，否則後果將會好嚴重。
球星鍾意娶模特兒或明星，好似費高老婆係模特兒，碧咸另一半係歌星，但日前小登科嘅皇馬後衞希古拉，就娶咗現職係記者嘅洛琳娜，唔怪得佢冇乜負面新聞啦！出席佢婚禮嘅人包括皇馬高層布達堅奴同前隊友馬基列尼，但六條A冇蒲頭，睇嚟佢同呢班球星嘅關係好一般。
秘魯隊長比沙路喺日前場美洲盃分組賽除咗被逐，重撞親個頭，事後證實要唞一個月。德甲聯下月六號開波，即係佢應幫唔到拜仁踢頭兩場；我求大俠聽聞拜仁新簽嘅伊朗前鋒夏舒文喺季前熱身賽表現唔錯，𠵱家比沙路要唞咁耐，出返嚟可能連正選都冇埋，今次真係得不償失。
意甲球會羅馬會喺後日開操，但艾馬臣就以患抑鬱症為由而唔會歸隊，重有醫生紙證明㖭！係人都知艾馬臣想轉投祖雲達斯或者皇馬，所以我求大俠真係好質疑佢真病定假病。記得患過抑鬱症嘅拜仁中場戴斯拿唞咗大半年先好番，如果艾馬臣可以喺季初比賽，咁即係佢詐病囉！
雖然由碧根鮑華大帝出面，但剛帶領希臘贏歐國盃冠軍嘅德國籍教練列哈格，都係拒絕返祖家教國家隊！怪就只怪德國佬自以為是，當年同列哈格鬧翻，迫到人哋流落異鄉；𠵱家至知道人哋有料，就想搵人返嚟，真係攞架嚟丟！列哈格嘅骨氣亦好值得各位學習。