應采兒近日與女子組合2R的Rosanne同時成為陳冠希的緋聞女友，應采兒前晚否認兩人拍拖，不過卻表示仍會繼續與Edison單獨約會。而Edison的過氣女友陳文媛昨日已除去兩人的定情手鈪，並說：「佢開心咪得囉。」
應采兒前晚與鄭希怡、胡杏兒、Boy'Z及原島大地等於廣州星海音樂廳出席「2004粵港未來巨星頒獎典禮」，並與安志杰、張敬軒及內地藝人吳瑕獲頒發「未來巨星大獎」。
應采兒近日被指是陳冠希的新女友，她前晚如沐春風，提到Edison與她唱K拖手後又與2R的Rosanne睇戲，她說：「關我乜嘢事呀？我都可以同其他人睇戲㗎。佢係ABC唔唱K㗎，我就唱。」問她怎會如此清楚Edison喜好，應采兒說：「大家friend嘛，有嘢就唔會咁大膽公開啦。」提到是否經常與Edison約會，應采兒說：「普通食飯就有，兩個都有，朋友之嘛，之後會照食。」那麼兩人有否機會發展？她說：「我哋公司好嚴，唔會㗎。」應采兒曾與中國星太子爺向展平傳緋聞，問公司是否只准她與太子爺拍拖？應采兒笑說：「唔知，你問番向太啦。」
Edison經常被指花心，對此應采兒說：「佢幾慘，同女仔食飯就會傳緋聞，唱K呢單冇可能，朋友嘅嘢，有男有女唔使咁suprise。」應采兒亦大讚Edison為人率直。
陳文媛昨日到中環出席港台活動，她已除去與Edison的定情手鈪，提到對方緋聞，BoBo說：「佢成日俾報章講好多嘢，佢開心咪得囉，最緊要自己知發生乜事。」至於兩人先後除去定情手鈪，BoBo說：「首飾唔關事，只係飾物，唔好睇得咁重要。」那麼兩人還有沒有聯絡？BoBo說：「點解要聯絡？唔使吓吓特別刻意聯絡，否則咪要恭喜好多次，佢成日俾人咁寫，男仔有魅力先多新聞，冇又點會成日話佢。」
採訪：史丹（廣州）、李珮洳（香港）
攝影：仇志德
