米杜士堡都算係今夏買人買得最狠嘅英超聯球隊之一，繼簽咗荷蘭後衞列斯加同埋澳洲前鋒維杜卡之後，佢哋日前又簽埋車路士嘅荷蘭前鋒哈索賓基，似乎野心唔小，而且佢哋行政總監林比重話，今夏擴軍並未完結，佢哋跟住嘅目標除咗係買斷由車仔借用嘅荷蘭翼鋒辛頓之外，重想買埋車仔嘅中後場球員謝利美。唔怪得連英國博彩公司威廉希爾都開出「米堡」喺○四/○五球季攞到聯賽前四名嘅賠率得十一倍啦。
不過，我求大俠都唔係咁睇好嘞。冇錯，維杜卡同哈索賓基雖然都曾經喺英超聯一季入球取得雙位數，而列斯加重捧過歐冠盃㖭！不過，佢哋年紀唔輕，而且紀律一向又唔係太好，加上同時間咁多新加盟球員，淨係培養默契都有排啦，未必可以喺新球季一鳴驚人。
我求大俠幾日前喺度講過查柏東尼走去葡超賓菲加做教練，可謂發霉球員嘅喜訊，事關當地傳媒預測佢會搵好多舊部屬加盟。話口未完，就得到佢親口承認第一個羅致目標，將會係AC米蘭嘅雷哥斯達；睇嚟其他費倫天拿舊部屬，例如阿丹尼、C阿武羅素等，都好快收到聘約嘞。
米杜士堡狂買人，但車路士就狂放人。車仔除咗有米茲洛、迪西里、比堤、華朗、史坦歷同哈索賓基離隊，辛頓同格朗基亞準備過檔；但咪忘記佢哋簽咗施亞、洛賓同保羅費拉拿同收番施馬田，重有兩、三件想買，所以大軍人數同上屆差唔多，邊可能係摩連奴定下嘅二十五人呀！
乜嘢係禍不單行，睇吓德國足總就一清二楚。佢哋𠵱家立立亂，除咗重未搵國家隊新教練接替辭職嘅禾拉，內部亦出現權力鬥爭。𠵱家佢哋足總主席禾費達畀人圍攻，話佢無能，要求佢下放權力，同司庫施雲施格一齊揸弗。話晒德國都係足球強國，希望佢哋化解呢次危機啦！
上屆德甲聯神射手艾列頓舊事重提，希望可入選巴西國家隊，並且出席○六德國世界盃，但我求大俠就認為佢死咗條心算啦！事關巴西前線有大細哨，又有新星法比安奴同阿祖安奴；而且艾列頓年紀都唔細，今年三十一歲人，不如叠埋心水踢好啲球會賽事，幫史浩克04攞盃好過。