中文大學嘅EMBA課程，每個月都會邀請成功領袖出席論壇，同學員分享成功秘訣。除非親身參與，否則外人都好難知啲領袖講乜。八方噚日睇《信報》，發現刊登咗太古集團主席何禮泰喺呢個EMBA論壇嘅講話。
何大班爆咗個秘密，佢話太古喺七十年代末期至八十年代初期犯咗大錯，無法吸納優秀嘅中國籍畢業生。
何禮泰話，太古對外籍員工採用舊式薪酬制度，好似何大班咁，薪金比中國籍同事重要高，即使工作同何大班嘅一模一樣。
因為咁，當八十年代香港經濟迅速增長，有才幹嘅中國籍同事紛紛離開太古，佢哋對同工不同酬感到不滿。過咗七至八年，太古先至明白唔可以期望員工接受差別待遇，但太古嘅競爭力已大大削弱。
到咗九十年代，香港或中國特色更重要，但大部分有前途嘅中國籍員工都離開咗。佢慨歎，太古好缺乏四十五至五十五歲嘅中國籍行政人員，「都怪我們在那關鍵時期犯錯」。
回顧香港近年發展，大班最擔心香港嘅教育。佢話日本領事館每年贊助一個學界日語比賽。分別喺香港及深圳舉行。去年兩個比賽二合為一，發現深圳學生嘅日語能力比香港學生好得多。唔係因為深圳學生比我哋聰明，而係因為他們對知識比我們飢渴，而且比我哋有決心得多。
（圖）何禮泰出席論壇，大講太古競爭力削弱嘅故事。
傳真︰2623-9278
電郵︰