剛於日前獲演藝學院頒發榮譽院士的黃秋生，今年緋聞不絕，他表示：「婚外情只係剎那光輝，但代價就如海豚撞岩石。」他自言不嫖妓亦不會玩一夜情，不是細膽，而是有智慧，黃太聽到後，相信可以放下心頭大石了吧！
黃秋生日前獲演藝學院頒發榮譽院士，母親、太太及兒子舉家撐場，開心不已。秋生擁幸福家庭，卻緋聞不絕，早前他被傳與名模孟廣美同遊台灣，一時又被傳與靚女撐枱腳，記者直指他給人的感覺很花弗，秋生日前說：「以前啲人覺得我係黑社會、吸毒㖭，試過有雜誌做街訪，有人重話覺得我老婆應該係做妓女嘅！」
秋生近日罕有地帶太太公開亮相，他否認是為了闢謠，他說：「我又唔覺佢好信我，報紙寫佢梗係會問啦，雜誌嗰啲名單，超過一半以上都冇嘢，有啲連感覺都冇，有啲就有感覺，好似話我同林寄韻，真係發神經嘅！」
秋生承認拍戲時確曾對拍檔動過心，但最多只是心猿意馬，沒有採取行動，他說：「我會同佢哋傾吓偈就算，婚外情嘅光輝只係一剎那，但代價好大，好似海豚撞岩石咁。你可以話我風花雪月，但絕對唔係酒色財氣。我唔會嫖妓，三唔識七，點知佢有冇病，亦唔會onenightstand。你可以話我細膽，但我覺得呢啲叫智慧！」
秋生表示不介意傳媒寫自己的緋聞，但底線是不要騷擾其家人，他說：「要跟咪跟我囉，唔好跟我屋企人，尤其係細路哥，我畀你跟到夠。」秋生表示和囝囝的感情很好，並說：「我覺得父親嘅形象就係背影，神秘又有啲距離，生咗仔之後，先學識點做一個男人，女人都係，生咗先至complete（圓滿）。我以前都驚㗎，如果有得選擇，我唔會結婚生仔，但係錯完又錯，又覺得𠵱家先最過癮喎！」
這兩年秋生成功減去五十五磅，由高峯期二百一十磅，減至現時一百五十五磅，他透露當初減肥是受劉德華影響，他說：「華仔嘅工作態度，令我有啲崇拜佢㗎，我見佢keep得咁好，就問自己點解佢做得到我做唔到。」
秋生減肥沒有固定菜單，但總括只有兩大類可以食，他說：「一係食齋，即係冇油冇糖冇鹽，乜調味都冇，第二係食狗糧，總之狗食得嘅嘢你都食得，好似湯渣咁。一定冇漢堡包食㗎啦，要keep就一定要犧牲，平時喺片場開工，咪行埋人哋度問『你食乜呀？食嚟睇吓？正呀，真係好食！』真係忍唔住，咪攞一嚿食，食一嚿唔會肥㗎！」
