和秋生講事業，初時講來講去牛頭不搭馬嘴，後來才明白記者指的是拍戲，他講的是舞台劇，他說：「事業唔係職業，我視舞台劇係事業，但搵唔到錢，電影對我嚟講係生意。做生意等於一個社會，唔係一個人大晒，唔係唔可以講道理，但相對地少。」
貴為影帝的秋生指自己拍電影從來都不順利，這兩年是表面風光，但錢卻賺得少，他說：「之前半年都冇搵錢，三個月冇做嘢，做舞台劇又三個月，加埋買飛送畀朋友，連的士錢都蝕埋，冇辦法，為藝術係要付出嘅！」
秋生曾經為生計拍過很多爛片，更曾成為票房毒藥，他說：「嗰陣兩日拍一部戲，二十日拍十部，粗製濫造，係影響個名呀，但冇辦法，唔拍會餓死，嗰陣連陳可辛都話唔敢搵我拍戲。」
今時今日的秋生，理應可以揀戲拍，但他說現時是「冇選擇地選擇」，因為只可以拍好戲，他看過楊凡《桃色》的劇本，雖然很想拍，但是卻過不了公司和廣告商的關口。
黃秋生在娛樂圈較傾得埋的朋友有劉德華、劉青雲、吳鎮宇、黃子華和杜汶澤，秋生說：「我要睇吓佢有乜叻過我，先值得做朋友。青雲穩重、子華讀書多過我、華仔勤力、杜汶澤聰明、鎮宇夠神經。」
問秋生覺得他與鎮宇誰較神經？他說：「我都不知幾正常，正常到大家覺得我儍啫！」
早前秋生點名批評演藝人協會，該會主席曾志偉亦是秋生的好友，他說：「中國人社會就係咁，老友有問題就臭屎密冚，好似董建華咁，唔通我覺得佢係一個好伯伯就原諒佢啲政績咩！」
秋生指自己鬧人鬧物並非出於正義，他說：「呢啲係大家嘅錯覺，其實我冇乜正義感，而且係容忍度好高嘅人，有啲嘢係忍咗十年八年先至爆發，啲人咪覺得我發癲。咁多年嚟嘅經驗話我知，應該有少少嘢就要發難，我好少同人抱不平，通常啲嘢係影響到自己同影響到大家先會講。」
問秋生keep得這樣弗，可有考慮拍寫真？他說好身材只是留給老婆看，並稱一世人只拍了一套露股戲，原因是要以毒攻毒，原來他讀書時因為頑皮，被老師罰除晒衫企出操場，一位女同學經過見到他的裸體，自此令他造成心理陰影，拍完露股戲才自動痊愈。根據資料，他曾主演《聊齋》系列三級片。
採訪：張止寒 攝影：陳慧安
場地提供：CClub
