行街鄭自上海回來，打電話通知左丁山：「喂，我搬去廣州喇，你若然去廣州度假，記得搵我。」上海唔好咩？咁繁榮，搵食易啲噃！行街鄭話：「你有所不知，上海人好叻，叻得滯啫，有乜好橋話畀佢哋聽，都好似石沉大海，但幾個月之後，你會發覺市面上有人用緊你條橋，你又奈佢唔何。我決定認低威，自上海撤退，轉戰廣州，呢趟唔打工嘞，同一班老友利用CEPA帶嚟嘅機會，在廣州創辦新公司。他朝有日發達咯喎，再北上上海。」
CEPA可容許香港人在內地設立獨資公司，唔使搵內地人做JV（合資），確實係靈活好多，行街鄭見機不可失，立即行動。佢本身係廣告、市場推廣、營銷高手，加上小小運氣嘅話，應該有希望打出一片天下。至於佢創業做邊瓣？唔肯講，話費事秘密策略、絕世好橋外洩，俾人照抄跟風。呢樣嘢，喺大陸好重要，內地不但產品盜版盛行，將別人嘅計劃翻版，亦唔會客氣。
畢竟桐油埕唔會裝汽水，睇怕行街鄭都係不離傳媒、廣告、行銷、推廣呢幾個大範圍。中國增長快，人口多，係中文傳媒?廣告嘅lastfrontier、前所未見嘅巨無霸市場，係人都恨到流口水，梅鐸呀、時代華納呀、德國人呀，無不施展渾身解數，希望打入內地市場。之不過，無論幾咁人才濟濟，財雄勢大，到目前為止，重係未見過香港中文傳媒或西方傳媒可以在內地大張旗鼓，大發其財。傳媒被內地視為宣傳工具，係中共得天下三大法寶之一，點肯讓畀外人？老前輩金庸好早就講過嘞！