煲碟王：<br>《絕世好賓》堅持到底就是勝利！

煲碟王：
《絕世好賓》堅持到底就是勝利！

《絕世好賓》同之前幾套《絕世好Bra》、《絕世好B》絕無劇情上嘅關連，構成《絕世好賓》嘅元素好簡單，勵志故事加上老套橋段，配合感人情節，加上幾個搞笑元素，效果出奇地良好，難怪上畫後都好評如潮。《絕世好賓》同時更帶出個「堅持到底，就是勝利！」勵志思想，遇到困難不要輕易放棄，睇完都覺得特別醒神！

記者：許福合

喜劇出色　演出精采
影片嘅喜劇效果相當出色，有賴劇中演員精采演出。劉青雲好戲係意料之內，喜劇感十足，《絕世好賓》更利用劉青雲一身黑色肌膚，配合自創菲律賓口音嘅廣東話，演賓籍男傭角色活靈活現，不得不大讚扮咩似咩，其中一幕劉青雲假扮汶萊王子更係超級搞笑。女主角梁詠琪則繼續《嚦咕嚦咕新年財》嘅演繹方式，雖然無咩驚喜，但仍有一定水準。至於配角方面，如詹瑞文、周聰、劉以達、許紹雄、羅冠蘭等，都交足貨。

■劉青雲外形黑實，配合自創菲律賓口音嘅廣東話，似足賓籍男傭。

■梁詠琪演富家女，去到深水埗搞出唔少笑話。



富家女兒　面對逆境
故事劇情其實冇咩新意，一開始就講到富豪方國立（周聰飾演）請保鑣，曾經係警察嘅陳志傑（劉青雲飾）前往見工並且順利成為方女兒Jennifer（梁詠琪飾）嘅近身保鑣，不過方要陳扮成菲律賓籍男司機Mario。Jennifer自幼嬌生慣養，過住奢華浪費生活，連過海都要坐直升機！於是方打算要Jennifer嘗試捱苦嘅滋味，而陳就要負起照顧兼保護嘅責任。劇情雖然老套，但算係近來少見嘅題材，觀眾可以看着電影中嘅千金小姐如何面對逆境到達「成材」地步，電影中一句座右銘：「堅持到底，就是勝利。」與電影相當貼切。

■劇中劉青雲扮鬼扮馬，喜劇感十足。

■梁詠琪嘅爆炸頭，大家有冇印象？

■Jennifer變成窮人，要自己親自下廚。

■每次失戀，Jennifer都要去食蛋糕。



鼓勵發奮　會心微笑
《絕世好賓》並非純粹旨在搞笑，更有借戲中處境鼓勵人的原意。尤其講到Jennifer失去財產要搬到破爛舊屋，決定自力更生賺錢，作為喜劇類型片種，此片採用輕鬆手法，並無多講悲情，Jennifer亦「好快」明白面對現實嘅重要性，將喜劇中嘅「悲劇」平衡得相當好。不過此片亦有要彈嘅地方，例如Jennifer與陳嘅關係鋪排唔夠充份，兩人一直都係主僕關係，當尾段講他們想念對方時，說服力並唔充份。單就一套喜劇而論，《絕世好賓》雖無令你笑到流淚嘅位置，但能令人會心微笑地欣賞，其實已相當不俗。

■Jennifer生活奢華，胡亂購物外，過對面海要坐直升機最為誇張。

■為令女兒成材，方與陳計劃令Jennifer捱苦。

■Jennifer要陳試食瘦身藥，真正搞到臉色「五顏六色」。

■陳追Jennifer追到日本，最後能否大團圓結局？

■富家女Jennifer外形非常前衞，排場驚人。