梁智鴻醫生辭去醫管局主席的第二天，我在外面吃午飯，臨桌一群上班族正在談論這件事。
「梁智鴻都辭職了，跟住重會唔會有人辭職㗎？」
「唔好嘞啩，趕時髦咩，個個都辭職，搵邊個來做呀？」
「話唔埋㗎，年年七‧一之後就辭兩件，不如開個盤嚟玩吓，賭下一個會係邊個呀！」
「唔好咁黑心啦！」
「梁智鴻嗰份主席工年薪幾多呀？」
「冇錢㗎，你冇睇報紙？義務㗎！」
「唔係吖嘛，原來係義工嚟㗎？」
「係呀，所以佢都算唔話得啦，你睇佢啲同事喊咁口面，就知佢份人唔差啦！」
「孭得呢個位，都幾辛苦㗎！」
「我有一次坐飛機見過佢。」
「係咩？真人點樣㗎？」
話題於是轉去了梁智鴻的模樣上，似乎和他同機也成了一種引人好奇和羨慕的機會，由此可見，梁智鴻在人心目中印象不差，這一次辭職，更得人好感，還有點挽狂瀾於既倒的氣勢，一錘定音，幫整個醫管局擋住了一場危機。
其實，不管沙士調查報告裏有多少批評的內容，香港醫護界在去年那場突如其來的災難中，表現積極，情操高尚，這是無可否認的事實。這是應該跟政治分開來說的。即使梁智鴻醫生辭職的決定，純是出於政治智慧，但他顧全大局的舉動裏，依然帶着一份難得的情義，這也是醫管局同仁對他依依不捨、廣大市民對他深懷好感的原因。