美股周四下跌，但港股噚日出現反彈，升82點，收12202，成交不足100億元。中央特准社保基金可以先買官債，率先投入香港市場，市場即時憧憬國內資金好快可以流入港股。此外，國企股快將公布的業績料十分理想，短期可能成為炒高藉口。
東大照明（8229）噚日復牌，講明公司與核數師就結清銷售額及部份採購付款的處理方法存在分歧，同時又披露被證監調查。噚日股價一度跌至0.18元，其後反彈回0.212元收市，跌幅收窄9.4%。
證監今次是運用證券及期貨證條例第179條，即是當證監懷疑公司涉及欺詐及失當行為時，便可要求公司交出若干文件作為調查。黑客話，隻股可以復牌，相信暫時問題唔大。不過，事件可能存在變數，持有此股的投資者宜考慮埋有關風險，至於應否繼續持有該股，真係要慎重考慮。
講起上市公司與核數師出現帳目處理的分歧問題，一位上市公司（並非指東大照明）財務及會計總監朋友曾向阿虎訴苦，話核數師有時真係雞蛋裏挑骨頭，要求好多無無謂謂資料及過氣帳目，如果交唔出，就要求加核數費。本來加費都無所謂，但對方竟連加幾次，令費用較原定金額高成倍有多，公司覺得有被玩之嫌，一怒之下寧願押後公布業績，雖違反上市規則，都要換咗個核數師，重新核過盤數。
阿虎心諗，公司一旦延遲公布業績，又或者臨時更換核數師，必定會引起許多市場揣測。
平安保險（2318）正式成為大摩指數成份股，但高盛仍要在10.30元頂到實，噚日收報10.35元，冇起跌，成交3.52億元，看來摩指效應都唔係咁大。
阿虎