噚日香港演藝學院第十八屆畢業禮，頒授院士榮譽畀五位傑出人士，其中有大家熟識嘅賭王何鴻燊，《無間道》嘅黃Sir──黃秋生，被譽為現時世上最傑出雙簧管演奏家之一甘閔霆教授，城市當代舞蹈團駐團編舞黎海寧，曾於加州美術學院出任表演藝術設計及科技系主任超過十年、現已榮休嘅汪偉舜。
學術機構頒發嘅榮譽，向來好受知名人士尊重，畢業禮噚日下午三點先開始，但係賭王同「黃Sir」兩點鐘已經到場。不過，一向健談嘅賭王喺畢業禮後，見到班傳媒由三點等佢等到五點，足足兩粒鐘，都唔肯回應兩句對樓市點睇，只係話「今日有啲唔舒服，冇嘢想講」。
畢業禮另一插曲係，演藝原本邀請政務司司長曾蔭權做主禮嘉賓，但唔知係咪唔想俾傳媒追問楊永強同梁智鴻辭職嘅事，所以曾司長無到場，改由民政事務局局長何志平頂替。有人話，肥平局長係繼任衞生福利及食物局局長最佳嘅人選。事關佢搞掂過雙村長制、賭波合法化等唔少「辣嘢」，連求咗支下下籤都冇事，王見秋事件亦甩到身，足見肥人有肥福，由佢接替楊永強，香港可能百毒不侵，沙士、禽流感都彈開。
（圖）右起：雙簧管演奏家甘閔霆、編舞家黎海寧、賭王何鴻燊，左起：演員黃秋生及科藝設計師汪偉舜，齊齊獲演藝學院頒授院士榮譽；何志平（左三）代替曾蔭權任主禮嘉賓。 李潤芳攝
傳真︰2623-9278
電郵︰