經紀陳講咗成個月，話傳賣殼嘅瑞力控股（491），終於落實賣盤，買家原來係公益界名人兼軟庫發展（648）主席余錦基。
由於今次賣盤作價僅係區區2000萬元買28.73％，計落每股不過0.696仙，所以瑞力噚日復牌，股價一度跌14％，低見1.2仙，但收尾有買盤接力掃上，令股價平收1.4仙，成交股數計落成1億股，但金額只係132萬元。
雖然隻殼話就話便宜，但究竟買嚟為乜嘢？經紀陳話，人哋話晒與財技高手相熟，買入自然有其理由。瑞力業績相當唔好睇，而早排公布業績時，亦講到明唔夠錢使，所以家陣有新大股東出現，真係唔排除會有新氣象出現。根據傳統智慧，瑞力稍後有動作，好大機會搞一次抽水集資。
另外，早排公布中期業績，盈利錄得17.4％增長嘅明豐珠寶（860），噚日除息，股價企硬之餘，重升咗3.9％，收0.32元。
經紀陳話，隻股上市咁耐就靜足咁耐，既然業績見得人，自然獲得垂青，所以成交較前活躍。
明豐上個月公布截至今年3月底止中期業績，盈利有2124.8萬元，比舊年同期升17.4%，兼夾有中期息0.25仙派。
慕容小初