張曼玉（Maggie）同玉寶表前行政總裁男友GuillaumeBrochard，自從舊年拍拖以嚟一直打得火熱，好似最近四年一度嘅歐洲國家盃喺葡萄牙舉行，Maggie就專登同男友睇波兼喺酒店嚟個鴛鴦戲水，鬼咁梳乎。
據最新一期《忽然1周》報道，上月底Maggie同Brochard入住葡萄牙里斯本嘅HotelPalacio，一齊落泳池游水曬太陽。其間佢哋唔單止喺水中攬攬抱抱，性格洋化嘅Maggie重不拘小節咁解開三點式泳衣坦蕩蕩咁搽太陽油，唔似喺香港咁拘謹。
跟住Maggie撞見何超儀同陳子聰兩公婆，同佢哋一齊歎茶，成班人有講有笑，傾咗成兩個鐘，認真happy！
張惠妹有見近日台灣中南部受到豪雨影響，好多巿民嘅家園都被破壞，無家可歸，阿妹有意幫佢哋搞個籌款演出，希望幫到呢班災民，范植偉都話要支持。不過阿妹嘅經理人覺得阿妹工作好忙，一度制止佢參加籌款演出，但阿妹就好堅持，希望集合藝人嘅力量去幫有需要嘅人。
孫燕姿早前喺內地成都演唱四川民謠《康定情歌》，引發「中國音樂著作權協會」索取演唱版權費糾紛，前藏族國大代表吳香蘭解釋呢首歌最早係藏文歌，係康定藏人編造傳唱嘅民謠，真正創作人無從稽考，所以冇侵犯版權，助理經理人林明蓉就話孫燕姿以後都唔會再唱呢首歌。而孫燕姿噚日喺長沙探望孤兒院，佢重捐咗五萬元人民幣同一批文具。
房祖名噚日去咗電台接受訪問，佢話自從賺到錢之後就出咗兩張附屬卡畀父母，而佢老竇成龍重開心到見牙唔見眼，不過祖名就吩咐阿爸唔好亂咁碌卡。
另外，祖名話自己平日都唔會買貴衫，有時佢覺得媽咪幾千蚊買一件衫好貴㖭，佢噚日都只係着住一件由成龍公司製造嘅T恤。而祖名前排為咗𠱁媽咪開心，重親自整咗一份火腿蛋早餐畀佢食。
電影《哈利波特阿茲卡班的逃犯》喺英國同美國都大收特收，前日喺香港上映，一開畫已經有二百五十二萬票房，唔單止破咗第二集嘅開畫紀錄，重打破埋第一集○一年開畫嘅二百二十三萬紀錄，成績真係唔錯。記得第一集香港總票房收成四千三百幾萬，睇嚟第三集大有機會再創新紀錄呢！
無綫每年同多間慈善機構合作搞騷，由於係做善事，所以無綫每次都係象徵式咁收番慈善機構幾十萬製作費，唔夠嗰啲就由無綫補貼；但由今年九月舉行嘅《星光熠熠耀保良》開始，無綫決定唔再補貼咁多，事關佢哋準備留番啲「彈藥」，用正無綫名義搞慈善騷，直接將啲錢捐畀一啲冇能力搞騷嘅慈善團體，幫助更多人。
