藝人頻頻要到內地演出，必須提交個人資料，不法之徒有機可乘。陳曉東曾被內地商場冒名宣傳，劉德華則表示他七年前已發覺有此問題，故只會委託一間公司接洽其內地演出。
香港藝人到內地發展及演出愈見頻繁，內地文化部審批演出，事必要藝人提交身份證明文件，若遇不法中介公司取得私隱資料，藝人該如何處理及防範？
劉德華在內地擁有龐大市場，常要到內地演出，身在北京的他昨日在電話中說：「呢個問題我七年前就發覺，嗰陣內地搞騷嘅製作公司唔係咁完善，可能有十間公司話要搞，只得幾間搞得成。如果我啲資料畀晒咁多間公司，冇辦法保障唔外洩，所以我以後只委託畀一間公司做，其他公司做嘅一定係假嘅，咪安全啲囉。」華仔謂除了在內地，其實世界很多地方都有此情況出現，很難避免。
陳曉東經理人羅嘉慧接受查詢時表示，東東近兩年拓展內地市場，曾有內地商場借東東之名宣傳，以在商場購物可換取演唱會門票，幸他們及時發覺即申請禁制令。羅嘉慧說：「呢樣嘢我諗防不勝防，我哋惟有小心啲，選擇一啲信譽好同合作開嘅公司，我哋亦會喺證件影印本上面加個大copy字樣嘅印同截角。」
古巨基經常往來香港及內地工作，他昨在電話中說：「啲資料一定要交出嚟，有好多途徑會流出去，不過冒簽名真係好過份。文化部審批時會聯絡藝人方面確認，呢個步驟好重要，係冇辦法之中嘅保障。」基仔謂他曾在網上看見宣傳他到某地方演出的廣告，他說：「我都唔知自己有接個騷，我只可以喺發現時呼籲歌迷唔好受騙。」
莫文蔚（Karen）和梁詠琪的經理人李小姐昨日向本報表示：「通常我哋接內地騷都係經華納唱片，小心審核先決定做唔做，唔熟嘅公司好少做。好似Karen之前喺內地嘅演唱會，係我哋自己搞嘅，咁就可以避免呢啲問題。華納咁大間公司，有乜嘢事都有根有據搵得番，啲騙徒見到係大公司，可能都會縮沙。」至於證件資料外洩問題，李小姐說：「因為多數唱片公司接，未必要畀證件，大家都知公司有乜嘢藝人，但唱片公司問我哋要，我哋就一定會畀。」
採訪：蔡如玉、張止寒
