安德利果汁（8259）配售的新股料下周上市，貨源供應增加，係趁低吸納持作中線投資的好機會。
今次配售的新H股，集資「晒士」只係1.38億元，唔算大，但由德意志銀行牽頭，亦可見安德利的份量。今次披成共1.785億股，售價0.8元，貨源大部份由基金接去，摩根大通上月便3次增持了合共2430萬股，令持股量上升至11.2%。
集團係中國最大規模的濃縮果汁生產商，亦係全球最主要的供應商，每榨季（通常由8月至翌年2月）的產能達12.5萬噸，佔內地總產量15%，主要出口市場係美國，佔內地總出口45%。過去3年（01至03年，12月年結），業績表現理想，營業額由1.40億元上升至3.64億元（人民幣．下同），盈利則由4200萬元升至7400萬元；集資所得，用作擴充生產設備和發展新產品，預期未來幾年的盈利仍可保持高增長。
今年首季，獲利3000萬元，升86%，已達到去年全年40%，主要係加入徐州廠房的貢獻。集團現時有4個生產基地，除江蘇省徐州外，還有山東省的煙台和龍口，以及陝西省的白水，都係策略性部署貼近原料供應地，省回運輸成本。
由於濃縮蘋果汁和梨汁的需求不斷上升，特別係梨汁，市場發展潛力極大，集團今次集資，其中7000萬元便用作興建生產濃縮梨汁的設施，3000萬元用作提煉蘋果渣以生產果膠和飼料，餘款將撥作營運資金和收購之用。
安德利心目中已有兩個收購對象，分別係國投中魯果汁和煙台源通果汁，若能成功收購，加上擴展完成，集團在06年的產能便可大幅倍增至25萬噸，分別佔中國產量50%和全球產量的25%，成為「全球最大」。
行業領導者通常係基金投資組合的必然成份股，隨着安德利不斷併購擴展，基金股的成份亦會愈來愈重。
04年，估計盈利可達1億元，升35%；05年有新產品提供收益，盈利可增50%至1.5億元，每股盈利8.8仙（折8.3港仙）。基金股值較高PE，以15倍計，1年目標價可見1.24港元。
郭兆誠