港股周四突然大跌200點，其實冇乜大壞消息，恒指噚日馬上識得彈，回升82點收市，雖然反彈力度唔算十分勁，但起碼技術走勢已轉好，大家都可以炒得安心啲。
呢兩日大市升升跌跌，大戶主要舞住隻中移動（941）及滙控（005），睇嚟下周港股向上多過向下，兩個大隻佬嘅Call輪可以望多一眼。
以勢論勢，滙控稍勝中移動，若升穿20日線（116.65元），下個位會試120元。周初提過滙控有隻Call輪9783數據靚，噚日正股升1元，9783跟唔足，只升兩個位，收0.68元，數據靚上加靚。隻輪行使價110元，9月30日到期，溢價0.7%，槓桿率17.1倍，非常抵玩，下周只要正股破位而上，9783溢價又正常番啲，真係贏到笑。
中移動噚日反彈1.3%，所提兩隻Call輪中，以9824表現較佳，升3.8%，收0.191元。9769只係微升1個位，收0.13元。兩隻輪數據其實唔係差太遠，如果下周正股向上郁得多，例如升穿24元，9769由「價外」轉「價內」，將更具爆炸力。
今個星期收租股多人捧場，九倉（004）昨升3.8%，收23.80元，一周上升6.5%，跑贏大市甚多，睇勢九倉下個禮拜會繼續升，上試24.50至25元阻力。周三推介的九倉Call輪9516估計未升完，昨收0.215元，升17%。
章盛