美洲國家盃第一期六寶半全場嘅投注額，竟然連一百萬都唔過，真係少得可憐；而咁亦引證咗我求大俠之前講嘅說話係冇錯，就係本港球迷鍾意即食，要佢哋等幾日先知有冇錢收，根本唔可行。
馬會喺歐國盃期間推出三期八寶半全場，但反應就好一般，頭兩期嘅投注額連百二萬都冇，連孖寶半全膽都不如。雖然，喺美洲盃馬會減咗兩關變番做六寶半全場，但因為呢個特別彩池本身唔吸引，加上球迷對美洲波認識唔深，兼且開波時間又騎呢，結果投注額得嗰九十四萬，更只係禮拜四口孖寶半全膽嘅三分一。
本港球迷鍾意玩亞洲盤，係貪佢可以好快就知道戰果，連贏和輸唔使理，但六寶半全場捱幾日先知結果，根本唔啱口味。如果馬會第二日想開特別彩池，最好從球迷角度諗，咪要佢哋煮好耐就得嘞！
英格蘭新星朗尼俾人發現紋咗個蘇超球隊些路迪有關係嘅塞爾特十字喺右手手臂，於是俾人傳佢想過去蘇格蘭搵食。雖然些路迪喺歐洲算大球會，但根本負擔唔起朗尼天文數字嘅轉會費；況且朗尼𠵱家咁當打，又大把英超聯大球會爭，點會去水準同英甲聯差唔多嘅蘇超聯踢波呀？
阿根廷喺日前場美洲盃分組賽大勝厄瓜多爾六比一，即刻熱上加熱，不過巴西助教沙加奴就話唔覺得阿根廷特別勁，重話贏一比○同贏六比○冇分別，贏波就得。但我求大俠睇完巴西噚日嘅表現，覺得阿根廷好過巴西好多，如果佢哋之後碰頭，真係擔心沙加奴畀阿根廷剝咗棚牙。
荷蘭前鋒雲尼斯達羅喺歐洲國家盃四強負葡萄牙出局後，批評瑞典球證費斯克執法尺度，結果被罰停賽兩場。荷蘭足總日前決定不作上訴。都好嘅，我求大俠知道「雲佬」呢排忙緊搞婚禮，而曼聯今夏早開操，「雲佬」蜜月無期，嚟緊九月同十月兩場世盃外圍賽停賽補數囉！
拉素新任主席朗高於周四宣布，球會財政緊絀問題已逐步紓緩，來季將繼續參與意甲聯。我求大俠聽到呢番消息都戥佢哋開心，話晒拉素近年喺國內甚至歐洲都取得不俗成績，就此沒落係好可惜。不過，𠵱家佢哋嘅教練及球星都走得七七八八，來季要重新建立王朝，祝佢哋好運啦。