明星藝人效應大，所以能夠拉上關係，都有助促銷，好似入伙二十多年嘅廣播道寶能閣，二座地下連花園單位，由資深投資者持有，單位最近放租，租客見裝修一般，原本唔係好想租，點知佢兩個女得知單位係藝人劉德華住過，就改變初衷。
租客既然係為咗個女想搵靚校網而搵呢區，咁就順應女兒意思，用九千蚊承租，單位千二呎，連四百呎花園，呎租七個半。
世紀21富山廣播道分行經理盧耀明話，聽講劉德華初出道時，曾住過呢個單位兩年幾，其間憑藉電視劇《獵鷹》一炮而紅。
劉德華新戲《十面埋伏》快將上畫，而且又準備開演唱會，人氣上升，所以業主順勢借用佢嘅名氣，果然收效。
盧耀明指出，單位放租兩個月，租客睇樓兩周，一直都係因裝修問題未傾掂，今次承租，可獲三周免租期，但會自費裝修單位。佢指出，單位租值應要萬二。
現時同區再沒有呎租低於十蚊嘅放租盤，比較平嘅租盤選擇有范信達道光輝園，五百五十呎，叫租每月七千五，呎租十三個六；而寶能閣一個六百一十呎單位，叫租八千五，呎租十三個九。
置業年輕化趨勢持續，成為唔少新盤嘅主要購買力。美聯物業統計顯示，第二季開賣嘅新盤，三十歲以下買家比例特別高，最多係屯門聚康山莊，比例達八成，可能同樓盤屬上車盤有關，而將軍澳怡心園呢個市區上車盤，比例都有四成。
較特別嘅係港島豪宅盤，薄扶林貝沙灣三期南灣，呎價高達七千幾起，入場費要六百幾萬，估唔到一成買家只係廿零三十歲，認真後生可畏。
二手方面，三十歲以下買家比例，第二季較第一季有可觀增長嘅係沙田第一城，比例達四成，新屯門中心就有兩成。
本港發展商同地產代理，近年積極進軍內地市場，部份成績唔錯，中原（中國）剛獲內地房地產雜誌「新地產」，選為「2004年中國10大金牌顧問」冠軍。聽中原（中國）董事總經理黎明楷講，集團去年代理銷售嘅物業總值達三百五十八億五千幾萬人民幣，比第二名多逾四倍。
暑假零售黃金檔期好快到，商場大業主紛紛舉辦活動吸引消費者。信和物業管理有限公司總經理陳欽玲表示，集團會斥資五百萬，辦「信和自游行開心購物游」，舉行同運動有關嘅活動，以吸引內地自由行旅客。
陳欽玲話，計劃辦中山及東莞自由行團，估計可開三十團，每團四十人，可接待千二名內地客，以每個人平均消費四千蚊計，料可為商場帶來約五百萬營業額。
她預計，商場人流可增加一至兩成，整體營業額相信可多一成半。
和記旗下3香港又有新搞作，同美聯物業合作，推出「美聯物業網站」，3客戶可以透過3G手機，睇到美聯嘅資訊，包括成交一覽、二手筍盤同熱賣一手盤等。美聯主席黃建業話，買樓要快要準，佢會買1對3G手機，同太座一齊用，以便即時做決定。
另外，佢亦會鼓勵夥計買3G手機，咁會唔會畀津貼呢？黃老闆話，做生意最緊要係武裝自己，況且樓市咁旺，夥計賺到盆滿缽滿，根本唔使佢津貼。
蘭西
電郵地址：
