荷李活猛片《蜘蛛俠2》喺全球叫好叫座，勢如破竹咁打破唔少紀錄，佢啱啱又以八日嘅極速衝破二億美元（約十五億六千萬港元）美國票房嘅佳績，破咗《蜘蛛俠》所創嘅舊紀錄，聽聞《蜘蛛俠》重會改編成音樂劇，延續呢個蜘蛛熱㖭。
近排《蜘蛛俠２》嘅男女主角杜比麥奎爾（TobeyMaguire）、姬絲頓丹絲（KirstenDunst）聯同導演森雷美（SamRaimi）等四出為電影宣傳。
佢哋前日去到巴黎時，心情非常之靚，無他嘅，因為套片喺星期三上映咗八日，已經喺美國突破咗二億美元，打破第一集嗰陣上映九日突破二億嘅紀錄。
而星期三嗰日《蜘蛛俠２》遇上新片《王者無敵》開畫，仍然勁收一千萬美元（約七千八百萬港元），穩坐票房一哥位置，相反《王者無敵》就只收得四百八十二萬美元（約三千七百六十萬港元）排第二，令人跌眼鏡。
有關方面除計劃將《蜘蛛俠》改編成百老匯音樂劇，重有意搵樂隊Ｕ２主音Bono同結他手TheEdge合寫劇內嘅歌曲，而劇本將由《哭泣的遊戲》嘅金像導演尼爾佐敦（NeilJordan）編寫，但消息仍未得到出版社MarvelComics嘅證實。
此外，英國最近有四千個影迷選出心目中最佳嘅漫畫改編電影，《蜘蛛俠》獲選第二位，而冠軍就係由添布頓（TimBurton）八九年執導嘅《蝙蝠俠》。