一百五十七萬港元可以買三十三手滙豐股票，但新加坡一位不願透露身份嘅商人寧願捐畀慈善機構，為求與美國股神、全球第二大富豪畢菲特食餐晏。
呢位老哥出價二十萬二千一百美元，喺eBay拍賣網站擊退兩位對手，贏得同股神食飯嘅機會；呢個價，比去年少四萬八千美元。善款將會捐畀一家救濟露宿者嘅慈善機構。佢可以邀請最多七位親友，同畢老喺紐約一間著名牛扒屋享用一頓大餐，當面請教股神投資心得。呢項「慈善午宴」今年係第五屆，過去曾列席嘅善長都話物有所值，係一生人難得嘅經驗。
畢老係好多人嘅偶像，每年股東大會都人山人海，儼如開演唱會。但要成為巴郡小股東，首要條件係購入每股高達九萬零三百美元嘅巴郡A股，約七十萬零四千港元。
傳真︰2623-9278
電郵︰