雖然話中央同民主派有排都未溝通得掂，但係支聯會嘅前常委岑建勳就攞住個同長毛一樣嘅一次過出入境證，已經人在上海黃浦江。
連岑建勳都返到大陸，邊個唔得？係人都知岑兄喺國安部門個file有幾厚，佢可以踏足祖國，直情係給港澳辦副主任陳佐洱一巴掌，佢老哥早前重鬼咁左話，班參與過營救民運人士黃雀行動嘅人點可以要求返大陸。
岑建勳今次可以回鄉，特首董建華應記一功，不過佢好似唔想邀功，拒絕評論個別事件。咁又係，如果中央唔打開大門放行，老董講乜都冇用。早前帶咗張民主派人士名單上京嘅朱幼麟亦唔敢邀功，話岑建勳唔關佢事，不過，佢本人的確認為「家和萬事興」，覺得大家應該加強交流。
老董呢輪密密做嘢見人，噚日見咗班學者同大學校長，今日見民協同前綫，希望改善施政喎。
傳真︰2623-9278
電郵︰