立法會收爐在即，最近氣氛講溝通同和解，所以議事堂內冇晒火藥味，連林瑞麟都讚卿姐有溫馨一面。
至於臨別秋波嘅李家祥就為咗慶祝個條《專業會計師修訂草案》喺佢任內獲順利通過，特登買隻乳豬去立法會記者室請大家食。
八方笑佢會唔會唞一屆然後捲土重來，佢笑笑口話唔好再搞佢。李家祥已經約晒班行家，下周三立法會會期正式完結後，一齊去恒生頂樓唱K食自助餐輕鬆吓。
李家祥就快甩身，佢啲同事重要繼續努力奮鬥，特別係民主派中人就更荊棘滿途。一講起回鄉，何俊仁就想起舊年九月，上海師範大學請佢返去講9.18事件，當時佢請梁愛詩幫手，可惜詩姐姐出盡法寶，都冇功而還。而李柱銘就死都記得九四年亞洲法律大會喺北京開會，本來有佢份，但係都因冇人肯畀個證佢而去唔成。
（圖）被問到會唔會唞一屆然後捲土重臨立法會，李家祥即刻話唔好再搞佢。
傳真︰2623-9278
電郵︰