上晝好地地，恒指只係微跌33點，但到咗下晝變晒色，個半鐘頭再跌多168點，全日埋單散200點。即月期指更差，跌夠282點，低水54點。
中移動（941）、滙控（005）、中海油（883）、聯通（762）、和黃（013）總共拖低恒指116點。個市冇乜大壞消息，反覆吓，吼低買藍籌Call輪。
和黃早段見過54元，上晝收53.75元，升1格，下晝散1元，收52.75元，再跌些少可望反彈，趁機揀Call輪，主角係9833，收37仙，散13%，10月中夠鐘，溢價5.6%，槓桿率14.3倍，數據呢件最正。成交最多係9766，10月尾夠鐘，輪價26仙，溢價9.2%，槓桿率20.3倍。9833少啲槓桿率，但溢價低好多，着番晒數。
中移動跌65仙，收22.90元，預佢跌到接近22元，到時喺低位收集Call輪，對象有9824與9769。9824喺9月尾夠鐘，輪價18.4仙，溢價5.9%，槓桿率12.5倍。9769喺10中到期，輪價12.9仙，溢價9.9%，槓桿率17.8倍。
國壽（2628）收4.525元，跌7.5仙，呢隻人壽股，鍾意上上落落，啱低買高賣，揀Call輪，9822睇得吓，9月底到期，輪價32仙，溢價6.5%，槓桿率14.1倍。下月中前到期嘅9658，輪價4.6仙，槓桿率98倍，勁爆，但行使價係5.50元，估計好難唔變廢紙。
章盛