小初噚日原本炒股炒得好地地，點知期指喺晏晝無情白事急跌，連帶炒開嘅股份都急回，認真冇癮。不過，噚日仍有幾隻跌市奇葩，例如成日傳聞會同IBM合作的文化傳信（343），同埋剛舉行股東特別大會，通過摩托羅拉入股的天地數碼（500）。
文傳噚日升勢凌厲，勁升11.7%，收0.57元，成交股數高達3.38億股，金額1.93億元。至於天地數碼，股價最高見過1.99元，最後雖隨大市回軟，但仍升9.8%，收1.91元。
其實天地數碼早個幾月前已公布摩記入股消息，但股價無甚表現，結果要等到開完股東會落實單deal後，班炒家先至肯郁手，小初大歎走雞。經紀陳話唔使灰心，可以吼過另外一個機會，中國鵬潤（493）早前傳出大陸家電零售巨擘想借殼上市，公司剛剛出咗股東通函，將在7月28日開股東特別大會，意味單deal亦接近完成階段。
鵬潤噚日逆市上升5.5%，收0.23元，但成交就好細，只得97萬大股，金額21.74萬元。
慕容小初