美國大公司業績期，周三宣布嘅美鋁同雅虎，其實都有幾好嘅增長，只係輕微低過市場預期，結果市後交易就遭到沽售，人人預計美股周四會下跌，港股就跌定先。
呢個禮拜，美股好弱，但港股唔跌，重頂住連升3日，噚日卒之散咗，大市插到最低收，恒指報12119，大跌200點，成交146億元，期指插得重急，大跌282點，低水54點。
恒指一掉頭，又跌穿10日線（12214）同20日線（12161），恐怕連5月開始嘅上升軌亦守唔住。港股中期後市雖然仍係看好，但短期表現難免會轉趨反覆，噚日只係第一日回落，大市可能要反覆整固多一兩個禮拜，之後再開展的大升浪，就會一帆風順，向目標13500至14000進發。
講番今次調整，幅度應該唔會大，50日線（11952）同上月中低位11800有支持。至於國企，個勢強得多，國指收4300，跌104點，重守在10日線之上，相信在4200水平可守得住。
趁市勢調整，可低吸國企同優質二三線股。噚日國企都回得幾急，好似3隻鋼鐵股，跌幅都成5%；江西銅（358）低收3.625元，亦跌5.2%；安徽海螺（914）收9.3元，又係5.5%。
大行呢輪大手買國企，有目共睹，佢哋買咗一「浸」，未買夠，又會鬆一鬆手，甚至插低一轉，再買過，到買夠之後，時機一配合，先會全力發動攻勢，大升幾十個巴仙。就舉江西銅和中鋁（2600）為例，前者升到上3.9元，後者去到4.5元時，佢哋重係大手咁掃，噚日股價雖然大幅回落，但仍然見到佢哋一路有買住，咁樣收法，貨源遲早收乾，到發力之時，可以升得好急。
呢輪一路有傳QDII會推出嘅消息，噚日有料到，話好快會落實。北水嚟到，首選對象自必然係國企，大行瞓個身落去，點會打無把握嘅仗吖！
噚日上升股（不計認股證）都有130多隻，最引人矚目嘅係文化傳信（343），連升幾日之後，噚日再大升6仙，升幅11.7%，收0.57元。本欄5月底推介時，股價0.415元，預期上升大浪會展開，目標5字頭。另外，遠東發展（035）亦好強勢，收1.63元，升6仙，睇勢會去到1.8元先停步。
郭兆誠