鄭希怡（Yumiko）年前以舞后姿態成功跑出，但其師妹梁洛施（Isabella）近月卻獲公司大放銀彈谷上位，有傳Yumiko因而失寵，情況有如當年Twins與容祖兒自己人打自己人的翻版，Yumiko坦言：「我相信啲fans係會走嚟走去！」
鄭希怡年前憑其舞技及野性形象在娛圈殺出一條血路，成為英皇受寵小花之一，但其年僅十六歲的師妹梁洛施卻成英皇今年力捧新星，公司自然會將最好的資源投資在她身上，故近日有傳Yumiko因此而備受冷落。
Yumiko早前在赤柱接受本報訪問，問她會否覺得自己正受到Isabella的威脅？她說：「唔好話威唔威脅，競爭好多，唔止佢一個，每年都有咁多新人，我幾鍾意佢呢個妹妹仔㗎，佢喺十三歲時我已經見過佢，當時我覺得呢個女仔又高又靚，𠵱家佢終於出道，都戥佢開心，我哋都有試過一齊出街影貼紙相，佢勝在後生，大把時間，又勤力肯學。」
Yumiko說：「我從來唔介意公司要放最好嘅嘢喺Isabella度，我都做過新人，𠵱家自己係大人，唔需要吓吓叫人哋睇住，Isabella啱啱至出碟，公司係好應該多啲照顧佢。」
當年Twins迅速竄紅，威力之大曾一度搶走英皇一姐容祖兒大批fans，現在Isabella冒起，問Yumiko會否擔心fans過檔？她說：「之前支持我嘅fans都重喺度，但我相信有啲fans係會走嚟走去，亦都一定有啲會永遠支持你一個嘅。」
Yumiko又說：「公司捧佢正常㗎，要有多啲機會同多啲資源，至會俾人認識，新人一定要用錢堆出嚟，初出道嘅時候，自己出三成力，公司出七成，但我𠵱家係第三年，自己要出七成，公司就出三成，你唔盡力唔進步，出面啲人一定會睇到㗎。」
Yumiko認同圈中每年都有很多女星湧現，所以一定存在良性競爭，她說：「娛樂圈係長跑，每個人都會有起有跌，以前我唔信不進則退，𠵱家我信啦，唔進步真係會退步，我重未夠好，大把嘢要學，我希望可以去美國進修，𠵱家我都重有跟老師學跳舞。」
採訪：朱倬誼 攝影：陳慧安
