班大狀出擊，搞到民主派大哥大同大姐大嘅地位不保。首先係余若薇，佢一下子成為民主女神，劉慧卿馬上失色；跟住湯大狀一出，李柱銘民主先鋒地位即刻受挑戰；最近梁家傑決定空降九東，李華明「師奶殺手」嘅地位都要拱手相讓。
肥仔明之前酸溜溜同八方講，佢已經升咗級做「阿婆殺手」，因為只有區內啲婆婆，全部都唔識梁大狀，猛問佢企喺度派傳單嗰位係乜水？至於班後生師奶就投向梁家傑啦。
雖然唔夠人爭師奶一族，但係大狀佢哋唔係敵人，九月會同民主派一張名單出選，肥仔排第一，梁大狀第二，胡志偉第三，華叔已經有言在先，到時會朝朝早幫佢哋手企街拉票，希望三個都入局。
不過，由於肥仔早年為咗食荔枝，被阿爺沒收咗本回鄉證，冇得帶街坊荔枝團，對拉票唔多唔少有影響，噚日立會「中指黃」黃宜弘帶咗二十籮荔枝嚟，重請記者食，班記者不忘荔枝明，特別叫佢一齊分享。
（圖）黃宜弘（右）嘅二十籮荔枝，李華明都有份食。
傳真︰2623-9278
電郵︰