數碼影音：
新裝Z40＋超細防水殼Casio暑假𠝹女套裝

今年輕巧DC真係大放異彩，幾乎各廠都有叫好嘅代表作登場。嚟到炎炎夏日，呢批生力軍亦紛紛推出專用防水殼，最新就有Casio大賣嘅Z40超細防水殼，再加上官方講到明女士專用嘅三色Z40，Casio暑假第一擊，擺到明為女而設。

記者、攝影：徐影龍　ImageGirl：Natalie

Z40PROFILE
感光元件：400萬像素CCD
變焦：3×光學＋4×數碼
屏幕：2"TFT
記憶：內置9.7MB，對應SD卡
體積：87×57×23mm
重量：121g

由於輕巧DC嘅體積比半專業機細得多，故此專用防水殼都可設計得好小巧，不論攜帶或實地使用上，都靈活輕鬆得多，擺脫過往防水殼必定係「大牛龜」嘅形象，落雨、潛水、雪地全天候出擊，連女士都可手持一部出街威，市場潛力絕對不容忽視，呢點亦係今年特別多細機防水殼推出嘅主因。
講番今日嘅主角EWC-40防水殼，對應Casio依舊熱賣嘅DCZ30及Z40，雖然體積縮細唔少，不過其防水膠邊及鎖扣都做得好紮實，畀到人一種穩陣安全感，唔怕心愛DC出現水浸危機。
EWC-40有效防水深度達40米，比上年較普遍嘅30米更進一步，而且屬全能型，DC上所有按掣都㩒得番，落到水隨時都可轉模式、改解像度、調校快門甚至睇相都重得。值得一提係隨機附送嘅柔光配件，令機頂閃燈柔化之餘，重有擴散光源作用，原理類似影樓用開嘅SoftBox，水中拍攝效果即時提升不少，熱愛潛水人士必用！

新裝Z40三色登場
Z40推出差不多有兩個月，Casio為延續呢部王牌細機人氣，跟防水殼同期推出三款新裝顏色，包括粉紅、青蘋果同淺藍色，一睇就知明攻年輕潮人用家，官方網頁重講到明畀女士用，加埋之前嘅銀、黑同香檳金，Z40總共有6隻色俾你揀，梗有一款啱你口味。
Z40可算係超薄機Z4嘅後繼版，由規格到體積近乎一樣，如400萬像素CCD、3倍光學變焦及2"大芒等。改良地方主要係大幅慳電，達到CIPS標準嘅360張連閃燈相片，而且行貨由日本製造，比祖國出產嘅水貨更為吸引。

水中攝影5大秘技
1.水中較暗，啟動閃燈屬指定動作，盡量揀選有柔化燈光嘅防水殼。
2.由於水比空氣折射度更高，DC好易對錯焦，記緊採用適當嘅遠景或微距模式。
3.喺水入面身體好難固定唔郁，尤其配搭光學Zoom時，好易出現鬆、郁、濛嘅手震情況，故應盡量提高快門速度。
4.快門太快驚唔夠光，不妨開盡最高ISO及最大光圈，總之一切以快門為先。
5.屏幕、閃燈Power及相片解像度應慳得慳，免卻頻撲上水換電換卡咁麻煩。

實地試影
筆者唔識潛水，影唔到珊瑚、蘇眉做相版，惟有放落屋企個魚缸度試影。加入閃燈柔化配件後，相片效果零舍與別不同，微距拍攝對焦迅速，好輕易就影到魚仔發呆個樣，的確好玩。

輕巧DC防水殼紛出籠
老實講，過往大大嚿嘅防水殼，雖然千幾蚊買返嚟，不過一年嘅使用率相信多極有限。今年就唔同，不但係細機DC嘅天下，而且專用防水殼一樣做到好細，唔好話潛水先用到，就算每次帶埋去沙灘玩，都唔算係負擔。

查詢：
（a）CanonHK（21702888）
（b）UltraPro（28817052）

同場加映：大芒王靚相即刻睇
近排多媒體硬碟機人氣度爆晒燈，SONY就一口氣推出多款相關產品，同為Casio代理嘅捷成洋行都唔執輸，返咗款名為ARCHOS嘅流動硬碟機，內置20GB容量嘅1.8"硬碟，多多相都擺得落，而且配備時下最大嘅3.5"屏幕，靚相大大張呈現眼前，一班人可以開開心心齊齊睇相。
除睇相外，ARCHOS亦支援MPEG4及MP3播放，周街睇片聽歌都得，影音娛樂一應俱全，而且體積跟SONY嘅VAIOPocket差不多細，拎出街都好方便。

捷成洋行
電話：29262320