唐寧早前與張家輝、林峯等往非洲肯雅拍攝劇集《天涯俠醫》，扮演無國界醫護人員的唐寧最難忘的，是要日夜飽受烏蠅纏繞的滋味，有一次更飛到她的飯中，令她哭笑不得。
唐寧、張家輝、林峯及鍾麗淇等早前齊往非洲肯雅拍攝《天涯俠醫》一劇，由於唐寧要在肯雅逗留三個星期，故她在出發前先行注射黃熱病及甲型肝炎等三支防疫針，又要連續四周服食防瘧疾藥物，以防萬一。
唐寧日前在電話中表示，今次大隊在當地一野生動物郊野區內住宿，而大部份的拍攝亦在該地取景，由於區內有不少村落，故拍劇期間，經常有很多部落的小朋友圍觀湊熱鬧，大隊也同時聘用了當地黑人作臨記，故此唐寧此行常與土人為伍。
唐寧笑說：「其實我哋去嘅地方都唔係太落後，只係唔知點解有好多烏蠅，重要專攻眼同口，好乞人憎㗎，我試過為咗烏蠅而NG，因為有隻大烏蠅喺我個頭頂飛嚟飛去。有次重好笑呀，有隻烏蠅衝入我碗飯入面，林峯徒手捉咗隻烏蠅出嚟，一手掟咗佢出窗口，但隻烏蠅唔死，重識飛，佢嘅生命力幾強呀！」
由於唐寧是次外景頗多，其中一日更要連趕兩組戲，所以大隊便安排她與張家輝及鍾麗淇乘坐小型飛機過組，唐寧說：「我生平第一次坐小型飛機，嗰次坐咗個半鐘，開頭重好興奮，但坐坐吓先知原來好辛苦，因為小型飛機飛唔高，一有少少氣流就郁得好犀利，我睇住家輝塊面開始青，大家坐完之後，就好似暈船浪咁，好想嘔，我諗冇乜必要嘅話，都唔使預
我再坐咯。」
採訪：朱倬誼
